(patouè de Velanoua)
Lo pan nér l'è lo pan tradichonel valdotèn, prodouì avouì an grousa proporchón de faèna de blo que vignè couè, d'abetudde, djeusto eun cou a l'an, deun le for di veladzo é vardó su le pan-atì pe ihé midjà lo lon de l'èivir eunsemblo i bouillón, i lasì é a la breuha.
Couée lo pan l'iye eun moumàn eumpourtàn, po djeusto pe l'alimentachón (deun lo passó lo pan l'iye eungn alimàn que pouchè po manqué su la tobla), mi étò d'eun poueun de vuya sosial. Le témouagnadzo de l'épocca repourton lo plèizì de se retroué devàn lo for euntrì le diféente fameuille di veladzo, moumàn ioi la fateugga l'iye souladjéye pe lo plèizì de reusté eunsemblo.
Vo pouode troué, deun heutta séchón, le matériel réalizó pe l'occajón ! Témouagnadzo oral conservó deun le-z-archive di Brel, lo non di-z-objè llétó a la panificachón deun le patouè de Perloz é Etroubles é eungn'euntéressanta fiche témateucca su la cultivachón di séréale eun Val d'Ouha.
