(patouè d'Euntroù)
La plan-èta que donte hi seugno l'è l'éhèila di berdjé (Vénus), l'élémèn l'è la tèra.
Lo Solèi passe deun hi seugno euntre lo 21 d'avrì é lo 21 de mi.
Couleur : lo vèa, la couleur de l'éhèila di berdjé.
Pira de la chanse : l'esméralde.
Métal : l'aràn.
Dzor de la chanse : lo devendro.
Caratéo
L'è eun seugno bramèn stablo : l'a la tiha bièn dua é l'è jaloù comme eun pou borgno. Comme la bihe, lo Bou se boudze é pense todzèn, mi can l'apprèn coutsouza la apprèn eun cou pe todzor.
Lo Bou l'ame po le tsandzemèn é l'a lo don de saì vardé le sou a coutì. Se fa po euntsanté di complemèn, eunsiste deun se-z-idó é so fée valèi se-z-eunterè. La coheumma l'è plen de santì. L'a eun for magnétisme fezeucco eunver le fenne.
Lo pi grou don l'è la pachihe mi la persévéranse étò. Lo Bou l'è a mimo d'otchan-ì henque l'ou, l'è for mi l'è tchica eunna londzagne é can coutsouza va po bièn so attendre sensa prisa pe tourné reprendre to todzèn, sensa se lagné é sensa pèdre de ten deun de recriminachòn inutille.
La nateua se manifeste avouì pachòn, pi grase a son tsarmo que grase i sentimèn.
L'è onnèto é sen bièn lo sans de l'ametchà... Férie de tot pe eungn amì, mimo a nivó économeucco.
La formachòn de la personna l'è eunfluenchéye de son eunfanse é de la fameuille : lo Bou so ioi l'ou arréé é suppourte po le-z-eumpozechòn, le-z-euntrigue é le grame lenve.
Gnan danjereu can s'apesèi que l'è ihó traì ou bièn eumpléyà.
I Bou mancon po le difó : la nateua possessiva, la pèize é l'euncapasitó d'évalué sè mimo lo pourton a ihé bondàn prézontueu.
So baillé de ferveur é d'amour a qui lèi reuste protso, mi i mimo ten l'è égoiste é jaloù. Pou arréé a l'amé heutte dzi caze comme se sian de-z-objè. Voualà perquè, dèi can l'è pitchoù, foudrie lèi eunségné a donté son arroganse naturella.
Can l'è dzouin-o l'è favorizó deun le rappor avouì le-z-otre, l'ame rezulté seumpateucco é soèn lèi aresè. Se llan, que sian d'amour ou d'ametchà, reuston stablo lo lon di ten.