Tsertsa

Dichonéo

Contenù di site

Multimédià

Teste eun patoué

Documàn

Eunterféranse, eumpreun, calque

interferences-francoprovenc-al_641_l.jpg

(patouè de Vagrezentse)

Si travaille l'ou isséi eun èidzo pe le personne patouazante méi étó pe qui s'aprotche de seutta lenva, eun baillèn de-z-eundecachón desù l'evoluchón que lo patoué l'ét eun tren de viquì é perqué seutta evoluchón pouèye reustéi équilibrée, respectueuza de la strutura orijinéra dou Valdotèn. Lo but l'ét a méitchà tsemeun euntréi l'ezijanse de recupéréi eun patrimouéno eun tren de disparétre é l'asétachón d'eun tchandjemèn que féi partia de l'evoluchón méima de la lenva.

Vouélà perqué, llouèn de volèi passéi comme de puriste, no créyèn eumportàn de possèi eunvitéi le dzé patouazante a tchertchéi devàn tot deun leur lenva le-z-espréchón pi convenable, méimo se sovèn sarie pi comoddo é pi prateucco de passéi a eungn atro code.

Fran perqué la lenva se trooue deun si parcour de trasformachón, no pouèn pa considéréi si travaille dza conclù méi djeusto bièn comenchà, deun la perspective d'euntégréi eun deunse de documentachón novéla é d'analize novéle que euntérèchon la lenva Valdoténa.

Le refléchón que no propoouzèn l'an pa la prezonchón de fonchoréi pe totte le 70 é pi variante méi son pitoù de-z-iteudzo su de fenoméno jénéral que son issà remarcà é que tsaqueun de no pou analizéi de fasón diferenta, eun relachón a son espérianse é a se-z-abitudde. Comme critére d'analize n'eun pensà de no reféye ou preunsipe de la « memouére d'ommo », avouì la consianse de la relativitéi dou nivó de siantifisitéi de l'iteudzo.