(patouè de Veullanoua)
Lo Centre d'Études francoprovençales « René Willien » de Saint-Nicolas l'è nèisù l'an 1967 mersì a René Willien, avouì l'idó de fée cougnihe le-z-ètude é le retsertse féte deun lo domène di difièn patouè valdotèn é de l'etnolojì de totta la Valoda.
Lo Centre l'a dzoyà eun role fondamental dedeun la retsertse siantefeucca su lo francoprovensal é dedeun sa promochòn. L'è feunque ihó a l'orijine de d'otre assochachòn eumpourtante comme l'AVAS é la Fédérachon Valdoténa di Téatro populéro é de serten-e istituchòn peubleucque comme lo Bureau Régional pour l'Ethnologie et la Lingusitique. Son role é se rapor avouì la comunitó l'an évoluà dedeun lo ten.
I dzor de vouì lo Centre l'è eungn eumpourtàn santre de documentachòn, l'a an bibliothèque spésializéye de premì plan, pebliye eun bouleteun (lo Bulletin du centre) que chour tsicque chouì mèise, propouze de projè a l'Amministrachòn réjonalla eun garantisèn la sèriétó siantefeucca de se propozichòn ; resèi de chercheur, de-z-eunségnàn, de patouazàn é tcheu hise que son eutèréchà i francoprovansal : mersì a an convenchòn, colaborre avouì lo BREL pe la réalizachòn de bièn de projè.