Djornà éntérnatsionala da montagna é Festival littérére

11 décembre 2017

(patoué dé Bretsón)

A modé dou 2003, l'Asembléa djénérala di Natsión Unièi l'a désidà dé dédié l'11 dé guijémbro dé touì y an pé a Djornà éntérnatsionala da Montagna. O but l'é dé valorizé é vardé un territouére qu'a l'é reutcho, ma, ou mémo tén, délécat.

Én effè, a montagna a varda un trézor dé biodiversité é dé manire dé travayé a tèra particuyére é qu'i van d'acort avó a nateurra. Ma pa mae tso. Contre a valour écolojécca, le territouére dé montagna l'an co eun'otrétanta valour queulterella é antropolojécca.

Le montagne, a travers le chè djen, vardon é porton avante dé traditsión é dé élémèn queulteurel espétchal. L'é o cas dou patoué én Val d'Ohta, lénga qu'a l'é guiettà ou cho territouére, ou cho climà é a cha économéa.

Dé tsetta gnoa idé da montagna, nach co o Festival éntérnatsional Lére a montagna qu'ou bétta énsémbio le pais da Conventsión dé y Alpi pé organizé dé événemèn qu'i valorizòn a lettératurra dé montagna é a diversité queulteurella.

Pé tsenécquie, saràn organizà, én moué dé pocht, dé echpétacle. En Val d'Ohta, l'a dja ichtà feut arie : a Féhta Lo Pan Ner l'a ichtà guiettà a Djornà da montagna, a travers a prézéntsa dou patoué.

Ma a l'é pochébio co dé djouenté d'atre initsiative. Pé saé comèn fére é cogniche le détai dou Festival, vejeutteu a padja http://www.alpconv.org/it/activities/IMD/pages/2017.aspx?AspxAutoDetectCookieSupport=1 vents o sito da Conventsión dé y Alpi.