(patoué di-z-Amaveulle)
Di 29 de jeun i 1ì de sétembro 2013, deun lo Muzé Cerlogne de Sen-Nicolà lèi sarén dave-z-espozechón « Eun atendèn la dezarpa... » é « Pamì de vatse, pamì de Valdotèn ! ».
L'espozechón « Eun atendèn la dezarpa... » l'è nèisua de la collaborachón euntre lo Centre d'Etudes francoprovençales « René Willien », la quemeun-a é catche dzoveun-o éleveur de Sen-Nicolà.
Atò de-z-imadze, de mot é de doquemèn vidéó, lo parcour de l'espozechón l'ou meun-é sisse que la vezeuton a déquevrì la fita de la dézarpa, mi seurtoù a mezaté su senque l'è la tradechón fase a la modernitó é a sertèn modélo di dzor de voueu.
Seutta espozechón é salla de Daniele Ronc « Pamì de vatse, pamì de Valdotèn » - organizéye pe la quemeun-a de Sen-Nicolà - sarén iverte i pebleuque devendro que veun, lo 28 jeun, a 8 euye di nite. Lo groupe de mezeucca « Laripionpion » son-eré su la plase de l'éillize.
Oréro d'iverteua de l'espozechón :
Muzé Cerlogne
La Cura de Sen-Nicolà
29 jeun - 1ì sétembro 2013
De 3 euye de la dèinon-a a 7 euye di nite
Lo deleun l'è fréméye