Tsertsa

Dichonéo

Contenù di site

Multimédià

Teste eun patoué

Documàn

'Pinocchio. La conta d’eun burateun de bouque'

19 janvier 2011

Avétsa l'imadze

Pendèn l'an scolére 2008-2009, Liliana Bertolo l'ayè consì, avouì l'èidzo di muzisièn Alessandro Boniface, an séria d'animachón consernàn lo personadzo de Pinocchio pe le-z-icouillì de l'icoula de Tsazallet iaou l'animatrise l'ayè, a si momàn lé, tradouì de passadzo di teste de Collodi, que l'e-z-eunségnante mime l'ayàn eumpléyà pe leur lesón.

L'Asséssorà l'ayè adérì a si projé que fenissae avouì eun spéttaclo pe le paèn, iaou le-z-atteur sayàn le mèinoù é iaou lo décor l'iye reprézentoù pe de dissèn reprodouizèn certèin-e chéne de la conta : de inque l'è nèissiya l'idoù de tradouèire eun patoué l'euvra de Collodi.

Dèi lo 24 janvieur 2011, saré poussiblo acoutì eun leugne le tsapitre di livro, so permettéré, a bien d'icouillì é d'adulte, de s'approtchì di patoué de fasón diffienta. La prézentachón di livro, eunritsì pe le dissèn que l'an fé le-z-icouillì de l'icoula maternella de Tsezallet, fé partiya d'eun projé didatteucco que conserneré 6 icoulle maternelle de la Réjón, iaou se lirèn de bocón di livro, se tsantéré, se dancheré, se djouyeré : totte le-z-attivitoù sarèn eun patoué avouì la collaborachón di muzisièn de la coopérativa Trouveur Valdotèn.

« La réalizachón di projé Pinocchio eun patoué – di l'Assésseue Viérin – reprézente eungn occajón particuilliya de promochón, de diffujón é de valorizachón de la queulteua locala é de la civilizachón valdoténa. S'eunsérèi deun le-z-inisiative de l'Asséssorà que l'an comme but si de proupozì i-z-icoule de-z-eunstrumèn didatteucco éfficase pe trasmettre la lenva di queue é pe la féye cougnitre i mèinoù. Pinocchio l'è eun livro cher a tcheu le-z-eunségnàn valdotèn, comme l'a dimoutrou-lo la gran reponsa di-z-icoule a la proupozechón de l'Asséssorà, é si cheur que si livro reprézenteré an pista de traaille bien euntéréssanta. »

Pendèn le mèis de févrì é de maas, le-z-icoule de La Salle-Derby, de Valtournenche, de Donnas-Vert é d'Excenex, comme l'icoula «Gianni Rodari » de Veulla l'aren-pi la possibilitoù de découvrì seutta noua verchón de Pinocchio.
 
"Pinocchio. La conta d'eun burateun de bouque" l'è itoù tradouì eun patoué pe Liliana Bertolo é publià pe le Trouveur Valdotèn é le-z-édichón Musumeci.

Vente di livro : deun totte le librérie de la Val d'Ousta
Pri di livro : 15,00 euró.