Nen saì de pi su lo Glosséro

(patouè d'Entroù)

Lo projè di Glosséro se propouze, a terme, de beté eun leugne adì an varianta pe tsicque quemeun-a francoprovansalla de la Valoda d'Ouha. Lo traille regarde d'eun coutì le mo, prèi eun pe eun, é de l'otro le teste.

Vu que lo but l'è po hi de mantchan-ì lo patouè dedeun eungn étà de prétenduya « pureté » de la lenva, mi pitoù hi de baillé eungn'imadze réella di patouè prèdjà i dzor de vouì, lo Glosséro va po tchertché se-z-eunformachòn dedeun lo patrimouèno de la litérateua classeucca valdotèna, mi dedeun lo langadzo couràn é dedeun la produchòn écrita di dzor de vouì ; pe la mima rèizòn lo solè critère de séléchòn eumplèyà di Glosséro l'è hi de l'attestachòn « a memouî d'ommo » di mo su plahe.

Eun considérachòn de la grousa variabilitó fonéteucca é lessicalla di patouè valdotèn, que de cou s'acape feunque dedeun la mima fameuille, lo Glosséro l'a po l'ambichòn de défin-ì « lo » patouè d'an quemeun-a (définichòn d'ayeur seumplamente téoreucca), mi se lemite a propouzé, pe tsicque quemeun-a valdotèna, an varianta permì totte halle dispounible : la varianta prèdjéye de nouho témouèn su plahe. É l'è pe heutta rèizòn que lo non di témouèn l'è todzor repourtó dedeun la fiche di mo.

Streteua di Glosséro

Lo Glosséro se compouze de dô sèchòn : an baze de donné é an bibliotéca eun leugne. Le dô sèchòn fourmon eun sistème euntégró ; ho l'ou dî que se pou pasé d'an sèchòn a l'otra eun permètèn a l'utilizateur an consultachòn globalla.

La baze de donné (lo glosséro dedeun lo vré sanse di mo)

Heutta baze de donné contchàn tcheu le mo catalogó a partì di fiche grammaticalle, di fiche tématique é, eungn avin-ì, étò de l'analize di teste recoueillà dedeun la bibliotéca eun leugne. Le mo se pouon consulté pe quemeun-a (liste eungn ordre alfabéteucco) u a partì d'eun moteur de retsertse. Dedeun hi ca eun pou fée an retsertse eun séléchouèn la lenva, la quemeun-a, la catégoriya grammaticalla u l'argumàn. Tsicque mo l'è complè de paradigme (sof le verbe que, pe lo moumàn, prézenton renque l'eunfinitif é lo partesipo pasó) é d'eunrejistremèn sonore, é l'è assosià i non di témouèn que l'a bailla-lò. A terme, l'è étò prévù l'eunserchòn de fotografiye relative a eun sertèn nombro de mo.

La bibliotéca eun leugne

Heutta sèchòn l'è destin-éye a recoueillì tcheu le documàn écrì, publià u po, que son ihó trascrì di Guetset dèi lo comensemèn de son attivitó. Tsicque documàn l'è acompagnà di teste eun lenva orijinella é, a terme, d'eungn eunrejistremèn sonore. La retsertse di teste pou ihé fette pe quemeun-a u pe janre (conte, conte pe le mèinoù, etnolojiye etc.). L'è étò pousiblo fée an retsertse a partì d'eun mo prézèn dedeun le documàn.

Métodda de traille

Considéró la vastitó di projè, l'è ihó desidó de prosédé pe degré é de beté eun leugne le donné drè que son dispounible, mimo eun sayèn que - seurtoù i comensemèn - lo traille prézentó sarè for euncomplè.

Premî faze : lo Glosséro seumplifià

Dedeun heutta premî faze, no contèn de beté eun leugne eun dichoun-éo seumplifià, compouzó d'apeprè 1800 paolle, cherduye euntrì halle que no-ze semblon le pi eumplèyéye dedeun lo langadzo de tcheu le dzor. Tsicque mo l'è acompagnà d'eungn eunrejistremèn sonore, caze todzor prèi di témouèn que l'a fournì lo mo.

Pe comenché n'en donque apreustó tri fiche grammaticalle : eunna pe le sustantif, eunna pe le-z-ajetif é eunna pe le verbe ; pe l'avin-ì son prévuye d'otre fiche  (article, pronòn, averbe, prépozichòn, conjonsiòn). Dedeun tsicque fiche le mo son ihó gropó a an fraze que édze a comprende mioù lo sanse de la paolla.

I mimo ten n'en prosédó a la séléchòn di témouèn. Lo chouà l'è ihó fa eun tchagnèn contcho di nivó de cougnisanse de la lenva é de leur disponibilitó a se spousté pe le-z-eunrejistremèn sonore : a terme, no contèn de posèi dispozé d'eun rézó d'adì eun témouèn pe tsaqueun-a di 71 quemeun-e valdotène francoprovansalle.

La numérizachòn di mo l'a donque pousù comenché. Lo chouà di premî 7 quemeun-e l'è ihó fa su la baze de leur distribuchòn su lo téritouéo é su la dispounibilitó di témouèn euntèrèchà pe la retsertse. D'otre fiche é d'otre quemeun-e chouérèn.

Seconda faze : l'« inventaire lexical » é l'analize di teste

Eun cou feniya la premî faze, lo glosséro de tsicque quemeun-a sarè euntégró avouì d'otre mo que no prègnèrèn de fiche tématique detailléye é de l'analize di teste dispouniblo dedeun la bibliotéca eun leugne. An boun-a partiya di fiche tématique son dza ihéye apreustéye, d'otre vignérèn eun chouèn.

Pe la préparachòn di fiche tématique s'è prosédó a la divijòn di lexique eun « aires thématiques » (ex. le biche d'eun tchi no, lo cor umèn, la relijòn, lo surnaturel é lo fantasteucco, lo ten etc.), tsaqueun-a devijéye eun diféente soucatégoriye (ex. pe le-z-erbe, le fleur é le plante : abro di bouque, abro a frouì, fleur, plante sarvodze, fruta é frouì sarvodzo etc.).

Contribuchòn esterne

(patoué de Tsaensoù)

Eun pi di fiche tématique que n'en propouzó i témouèn, no pensèn étò d'euretsì nouho Glosséro atò lo matériel de d'otre retsertse, publiyéye u po. No prézentèn hé dézò la lista de hi matériel é, se l'è lo cas, le critère que n'en applecó pe la translittérachòn.

  • Ivo Lavoyer (2011), Glossologie et flore des Alpes, IIe édition, Imprimerie valdôtaine, Aoste. (580 espèces végétales pour un total de 5890 lemmes saisis).
  • Christiane Dunoyer (1994-1995), Les dénominations animales en francoprovençal valdôtain, Mémoire de maîtrise, Université de Savoie, Faculté des lettres, sciences humaines et sciences sociales - Università degli studi di Torino, Facoltà di lettere e filosofia. (17 poueun d'anquète, 100 non de biche, 1692 mo eun patouè).

Annexe

Fotografiye

  • Archive de l'Assessorà réjonal de l'éducachòn é de la queulteua
  • Archive de l'Assessorà réjonal de l'agriqueulteua é di rezourse naturelle
  • Bruno Domaine –Archive de l' Assessorat  réjonal de l'éducachón é de la queulteura, Guetset leungueusteucco
  • Corrado Letey - Assessorà réjonal de l'agriqueulteua é di rezourse naturelle
  • Fabrizio Truc - Assessorà réjonal de l'agriqueulteua é di rezourse naturelle
  • Lionel Luboz
  • Luciano Ramires - Assessorà réjonal de l'agriqueulteua é di rezourse naturelle
  • Parc animalier d'Introd
  • Roberto Andrighetto - Assessorà réjonal de l'agriqueulteua é di rezourse naturelle

Remersiemèn

Eun pi di sujè eunstituchonel que l'an partisipo a tcheu le nivó a la réalizachòn di projè, no-z-esprimèn nouha pi profonda recougnisanse a tcheu no témouèn que, pourtó d'eungn amour sensa lemite pe nouha lenva é nouho péì, betton tsicque dzor a dispozichòn di Guetset hi magnifique trézor de savouer, d'entouziasme é d'euntèlijanse que l'è l'éritadzo lo pi présieu de nouha sivilizachòn valdotèna.