Boun-e féhte a touit !

12 décembre 2019

(Patoué dé Arnà)

Co oyèn n'en arevà a la fén dé l'an é comme la cohténma arive lo momèn dé faé-sé lé souè dé boun-e féhte.

Lé pais tornon empiehtré-sé dé lutche coloraye qué aleunnon a dzor lé tsemén é lé mitte. Lé minà atendon pa d'atro qué d'ivrì lé lor paquet dézot la pianta dé Tsalende, totta bella décoraye. Qui fèi mindzì i mitte envioun-e a pensé a hen qué beté so la tabia pé Tsalende, coque totta la fameuye arive. Qui y et vià, pé travai ou pé steguié, vèi pa l'oua dé tornì i mitte pé embrahì la fameuye é lé amis, tot contèn dé pouyi-ie doun-ì lé piquiot régal qué y an ihtà atsétà pé l'ehpres. Qui, ou contrée, y at cahquieun dé la fameuye louèn fèi en magnée dé mandé-ie da per ten in paquet to cahtsoza dé bon a mindzì, cahtsoza qué ise lo gueust di mitte. Y et qui, ou contrée, y at pa co pensà a ren pé Tsalende, perqué prét dou travai ou di sén bague, é qué, coque manque poué in per dé dzor, trelle a tsertsì lé regal dé la déré mineutta. Y et co qui ihte pa bén é y at mangaa dé gro tracah, ma co leu atèn lo Tsalende to la spén-anhe qué tot alase pé lo mièi. Dièn qué ognédeun a la sén magnée sé apreste pé Tsalende.

Ent'é l'er té sentéh tot fricahì dé énerjì, dé movimèn, dé voya dé doun-ì lo mièi dé sé, dé voya dé fae sentì qui lanmèn, la persoun-a pieu emportanta ou mondo. Qué bé momèn lo Tsalende ! Fèi tot sembié pousébio, len é bé.

Donca in gro souè dé Boun-e Féhte a touit : a qui trelle, a qui fèi mindzì, a qui atséte lé paquet, a qui atèn dé ivrì lo sén, a qui organize cahtsoza dé spétchal, a qui y et pién dé spén-anhe, a qui vout doun-ì lo mièi qué y et. Qué lé sondzo dé touit pouisson vignì veetà.

 

Bon Tsalende é bon an dou Gnalèi !

Sé pout trové dé matérial pé lé minà, comme la poézì hé dézot, so Tsalende é so lé féhte a hitte lièn :

http://patoisvda.org/pa/index.cfm/marche-vert-de-noel.html

http://patoisvda.org/pa/index.cfm/tsalende.html