Réjón otonomma Val d'Outa
Asséssorà de l'éducachón é de la queulteua
Communicachón pe le journaliste
Prezentachón di portal eunternet www.patoisvda.org
Lo portal francoprovensal valdotén
L'Assésseue de l'éducachón é de la queulteua de la Réjón otonoma Val d'Ousta, Laurent Viérin, l'a prézentoù, dedzoou 10 févreui 2011, a 15h, deun lo Salón di conféranse de la Bibliotèque réjónala de Veulla, lo portal eunternet, dédià a la lénva francoprovensala é a la queulteua valdoténa, www.patoisvda.org.
Lo portal, réalizoù complétamente eun trèi lénve (patoué, fransé é italién), l'a trèi objétif préseui :
- baillì le-z-eunstrumén a tcheu seuisse que looun aprénde é perféchon-ì lo patoué, eun beuttén le riille pe l'uzadzo de la grafia è de la grammére di patoué ;
- trachì l'orijeuine è l'évoluchón de seutta lénva prézénta deun lo térritouéro di-z-Alpe di coutsèn ;
- témouagnì é propadjì la queulteua valdoténa a traé le poète, le-z-écrivén é la littérateua populéra orala avouì cheu proverbo, le fasón de deuye, le rangueun-e, le conte...
Qui l'a fata de suppoo spésefeucco pe aprénde lo patoué i mèinoù l'a de matériel didatteuco que l'è itoù fé espré pe satisfére le-z-ézijanse é pe trasmettre la lénva avouì plèizeui - eun dzouyén (tsansón, illustrachón é dissén que fa colorì é complétì...).
Saré poussiblo s'eunscreuye i portal pe resèire eunna lettra d'eunfourmachón iaou sarèn mandéye i dzi totte le noalle si le contenù é le-z-inisiative organizéye pe l'Asséssorà de l'éducachón é de la queulteua.
Bién d'eumportanse l'at deun lo portal lo dichonéo sonore di prèdjì francoprovensal de la Val d'Outa. L'é eungn eunstremén que permé a qui lo eumplèye de tchertchì, deun lo glosséo, an paolla deun le trèi lénve de référanse (patoué, fransé é italién) é de nen cougnitre le traduchón, de acouté-la a traê le-z-eunréjistremén sonore é de la beutté protso de d'atre prèdjì de d'atre queumeun-e. Lo glosséo permé étó de vire é acoutì le teste iaou la paolla l'è prézénta.
Lo traaille l'è panco feneui. Pe lo momàn n'a 16.000 paolle que feuyon parteuya d'an séléchón de patoué de la ata, la mouayénna è la basa Vallaye. Lo projé prévèi de prénde eun considérachón di mouénte eun prèdjì pe tsanqueun-a di 71 quemin-e de la Val d'Outa.
Pe cougnitre véyo l'è uteuilo lo portal d'eun poueun de veuya didatteucco, l'è prévì eun course de formachón pe le-z-eunségnàn euntéréchà que saré fé deun le-z-eunstituchón scolére valdoténe.
Seutta inisiativa - di l'Assésseue Laurent Viérin - eumplèye le sou di minoritoù leungeusteuque é se propouze de valorizì é de promouèi l'euntéré é la sensibilitoù eunvê lo patrimouéno leungueusteucco de noutra comunotì, perqué lo patoué gagnéye prestije é plèin-a dignitoù, eun réussissén a donté tcheu le doméne d'an lénva moderna, comme lo setteue de la poleteucca é de l'aministrachón. Lo portal va se djontì i nombreuze inisiative que l'Asséssorà de l'éducachón é de la queulteua l'a dza réalizoù pe la valorizachón de la « Lénva di queue » comme lo Concours Cerlogne, l'Icoula Populéra de Patoué, la relanse de la Civilisation Valdôtaine deun le-z-icoule, la réalizachón d'audio-livro eun patoué, lo souteun i téatro populéro é la Messa eun patoué que l'è itéye deutta eungn occajón de la 7ème Fête Valdôtaine et Internationale des patois.