(patouè d'Euntroù)
Lo 3 d'otobre 2011, l'Asesseur de l'éducachòn é de la queulteua de la Réjòn otonomma de la Valoda d'Ouha, Laurent Viérin, l'a inauguró le doo lèitiì de Plan-Euntroù é di Veulle-Damòn.
Lo projè, réalizó eungn occajòn de la coopérachòn « transfontalière » Italie-Franse 2007/2013 ALCOTRA 2007/2012 n. 85 Traditions actuelles eun collaborachòn avouì la quemeun-a d'Euntroù, s'eunsérì dedeun eun parcour su l'alimentachòn que par de Mèizòn de Breuille, eun llouà dedià a l'alimentachòn tradichonella eun montagne é a la promochòn di prodouì di tèritouéo.
Lo parcour contenuye a la lèitiì di Veulle-Damòn, ioi que l'ée d'an vyiille fontan-a (la Goille) l'î eumplèyéye pe fée viondé la berî, é aprì a la lèitiì de Plan-Euntroù, ioi que se pouon decouvrì tcheu le moulo que dzoyoon pe traillé lo lâhì. Todzor dedeun heutta lèitiì son a remarqué étò le « separtiye », eun sistème de divijòn di lardzo de la crotta ioi que se cramô lo lâhì.
Dedeun hi traille de récupérachòn di lèitiì l'è ihéye rezervéye eungn'atenchòn particuliéa a la lenva di llouà : tcheu le non di bague (eun patouè) son ihó transcrì avouì présijòn di Guetsè Lengueusteucco, lo servicho de l'Assessorà que s'ocupe de la promochòn é de la valorizachòn di patouè.
A la feun di parcour no aréèn a la quezeun-a di tsahì, eun llouà marcó d'eungn'istouare vyiille de siècle.
Avouì hi projè, l'Assessorà de l'éducachòn é de la queulteua contenuye dedeun sa poleteucca de « restituchòn », avouì lo but de rendre dispouniblo, tan pe le touriste que pe le dzi di llouà, eun patrimouèno queulturel i mimo ten matériel é eunmatériel. Eungn effè, se l'è vée que le traille son ihó réalizó su de micho, l'è étò vée que hise micho d'eun cou son le témouèn di savouer de nouho vioù é d'eun nivó d'organizachòn sosialla remarcobla. Heutta organizachòn, i dzor de vouì évidamàn supéréye di ten, varde teteun de prensipo que reuston todzor d'an grousa attualitó. Mèizòn de Breuille é la quezeun-a di tsahì d'Euntroù completton hi tsemeun, euntrì l'alimentachòn tradichonella é le produì di tèritouéo.