Lo Coronavirus tsi no

11 mai 2020

 

 

(Patoué dé Arnà)

Dé l'envión dé l'an y an arevà dé beurte novale dé l'atro coté dou mondo, d'in virus qué sembiave fae ihté bièn mal la dzen é qué y avive pa gnia cura. Ma, sive l'atro coté dou mondo. Aviquiavèn déhpiézì hen qué capitave outre lai, ma en contenevèn la nouhtra véya dé touit lé dzor. Hé en Val d'Ohta n'en fét la Féa Sent Ors é lé Carnaval, touit tranquille qué la baga iéèye pa toutcha-no, qué éèye pa arevà fenque i nouhtre belle montagne.

Ma y at pa ihtà paé, co a no y at ihtà mandà dé ihté i mitte, dé pa sorte sé pa pé grosa manca. A l'envión sembiave co caze n'aventeua ! Hcole saraye, pa lo travai, voualà y et comme éhtre en vacanhe. Ma apré in pocca, sembiave dé ehcouté lo nét in bollétén dé guera, to lé numéó é lé fasteugguie qué crèsivon. 

Savèn touit fer, comme co fenque lo ten ise ferma-se. Atendavèn. Atendèn. Atendèn hen qué ? 

Dé torna pouì sorte, dé torna pouì fae la nouhtra véya dé touit lé dzor, dé torna pouì alé a travaì, dé torna pouì alé a hcola, dé torna pouì fae tot hen qué lanmavèn pa davàn ma qué aya no manque paé bièn.

Y et co qui y at ou y at avì dé paèn ou dé amis malado, qui y at senti-se gnoqué dé la pouye. Spéèn qué lé bague ison alà bén é ison cahquieun protso qué ié teun la man é què pout idi-le.

D'in coté sive, mangaa, co hen qué n'avèn manca pé fermi-se in momèn. Pé doun-ì pieu valor a in potén, a ‘na caèhe, ou nouhtro travai, a la hcola. Y et dé dzen qué y at envion-à a cognehtre mièi lé sén vezeun, lé fameuye qué y an torna pouì pasé dé ten ensembio. N'en torna dehcovrì hen qué vout deue doun-i-se in co dé man. 

Eun-a di bague pieu belle dé tot hen qué ihte capitèn y et proppe vére comme la dzen sé ihte idèn, comme trouve la magnée dé faé-se protso dé louèn.

Y et qui dit qué, co qué sé tornéat ivrì tot, lé bague séàn déféente, la dzen iéat capì pé dabón hen qué meeutte ent'é la sén véya, hen qué y et pieu emportàn. 

Dzo sèi pa hen qué séat. Ma cheur la pouye, la fasteugguia, lo pa pouì sorte di mitte, lé do métre dé louén dé eun a l'atro, lo pa tousti-se, lo pa embrahi-se son dé bague qué sobréàn ent'ou cor di dzen. Séat pa len torna envioun-ì. 

Ma cheur, sé liséèn pa gnoqué dé tot hénéque. Tornéèn lévé-se, fiér, prest a torna tie foua lo mièi é fae vére qué ren pout fermi-no, ren pout empétsi-no dé éhtre qui sen !

Donca, forhe ! Fat pa molé ! Fat tignì bon, fat tignì deur é lé bague, pian pian, tornéàn comme la cohténma. En tignèn, ent'in piquiot cantón dou cor, hella sensachón qué n'en aya, hella voya dé envioun-ì, hella voya dé fae, dé hquiapé lo mondo.

Tan dé souè a touit, dé cor.