(patouè de Veullanoua)
Deun lo but de valorizé nouho patrimouéno immatériel, l'Assesseur a l'Éducachón é a la Queulteua, Laurent Viérin, l'a anonchà que lèi son de contà avouì l'UNESCO pe évalué l'opportunitó de recougnihe lo francoprovensal comme patrimouéno universel de l'umanitó é beutté eun martse le prosédeue nésessée, eun collaborachón avouì lo Vallè, la Ota Savouè é lo Piémón.
L'Assesseur sostchàn que lo patouè l'è an seuntèze de valeur, de rélachón é de signifià que an populachón de montagne l'a batì deun le sièclle, eun portèn deun an lenva euncò bièn vivanta eungn'espériensa orijinella, se po eneucca, de civilisation alpine. An recougnisensa bièn eumpourtanta étò eun considérachón di fé que, eun Val d'Ouha, lo patouè, orgueuille de nouha comunitó, l'è euncò prèdjà pe le dzoun-io, souà eun fameuille que eun difiente occajón, eunna su totte, lo téatre populéro.
Todzoo selón l'Assesseur, lo patouè, lenva di queur di valdotèn, ren lo reutso patrimouéno queulterel que la nouha comunitó l'a saù mantchan-ì, mimo i mentèn di grou tsandzemèn que lèi son reustó deun la sosiétó. La volontó l'è de contenué a fée vivre lo patouè avouì la convinchón que, a coutì di role di fameuille, de la sosiétó é de l'achón fondamantala de l'ecoula, an fonchón for eumportanta pourè ihé bailléte pe heutta recougnisensa eunternachonala.
Se vouì lo patouè l'è euncò eun via, sostchàn l'Assesseur, no lo déyèn i nouho granpée é i paèn que l'an eunségna-lo é prèdja-lo i noue jénérachón. A no, vouì, lo devouer de contenué a traillé pe an valorizachón de heutta lenva a traver sa valorizachón a l'ecoula, deun la sochétó é eunternachonala.