(patoué de Tsaensoù)
Devendro 10 mars, i Muzé Nachonal di-z-Ar é di Tradechón Populére de Romma, le reprézantàn di Guetset leungueusteucco, de la Fédérachon Valdoténa di Téatro Populéro, de la Tsambra de commerse valdoténa, de la quemeua é di Landzétte de Boursa, avouì la tsanteuza é eunterprète Maura Susanna, l'an partisipoù a eunna di difiente rancontre di projé Gli Italiani dell'Altrove, si eunvitachón de la sochétoù BIA, que pe contcho di Ministére di-z-attivitoù é di bien queulterel é di tourisme, l'a organizoù seutta inisiativa.
L'euntenchón de si projé l'è si de féye cougnitre la réalitoù di minoritoù leungueusteuque, d'eun cou é di dzor de oueu, eun moutrèn étó leue patrimouéno queulterel.
Lo lon de la dzornoù, lo professeue Saverio Favre, dirijàn di BREL - Buró réjonal Etnolojì é leungueusteucca - l'a prèdjà a fon di-z-aspé etnografeucco é leungueusteucco ; la Fédérachon Valdoténa di Téatro Populéro l'a, de son coutì, permì i pebleuque de se ditendre eun prézentèn caque pégna pise, tandì que la Tsambra de commerse valdoténa, l'a, aprì avèi bièn portoù le salì tradichonnel, offèe i gran pebleuque an bocon-où de prodouì de la tradechón francoprovensala.
L'aviproù se son tcheu rejouì avouì le Landzétte de Boursa é leue voya de féye fita, é le tsansón de Maura Susanna.
Lo Guetset Leungueusteucco Lo Gnalèi l'ayé, deun la sala d'onneue di Muzé, eun caro to pe lli pe baillì de-z-eunformachón, to lo lon de la dzornoù, si le-z-attivitoù que porte eun douàn mi surtoù si lo projé di glosséo eun leugne que l'aré de sé caque-z-àn di mouènte eun patoué de tsaque quemeua de la Val d'Outa é que pe lo momàn nèn prézente dza 23.
