Tsertsa

Dichonéo

Contenù di site

Multimédià

Teste eun patoué

Documàn

Tourna avouì mè

Lo premì musical eun patoué

(patoué de Dzonsàn)

Deun la Saison culturelle 2011/2012 propouzén pe lo premii cou eun spétacllo de mezeucca eun patoué, baga noua euntre le propozichón queulterelle de la Val d'Ousta, avouì la commédì Tourna avouì mè, que pourteré su lo palque le-z-atteur de la Fédérachon Valdoténa di Téatro Populéro, la corale de Vagrezentse é la partésipachón estraordinéa de Maura Susanna é Ranzie Mensah.

L'euvra, écritta pe lo drammaturgue Benedetto Sicca é prodouita pe l'Assessorà de l'éducachón é de la queulteua de la Réjón otonomma Val d'Ousta - eun collaborachón avouì la Fédérachon é la compagnì téatrala Sinequanon de Alessandra Celesia - valorizérè pa djeusto le personalitoù di poste, mi étó la lénva di Valdotén, lo patoué.

Deun si momàn, eun Val d'Ousta, no sén eun trén de travaillì pe feuye vin-in lo patoué sémpre peui patrimouane de tcheutte. L'idoù l'é salla de valorijì la lénva di noutre vioù, d'eun coutì, bién cheue, comme espréchón di noutre réise é di noutre tradechón é, de l'atro, comme lénva d'euntégrachón pe permettre mimo a sisse que son pa Valdotén de se recougnitre deun seutta comunotì é deun se valeue.L'é avouì si espreui que l'é vìgna-no l'idoù de seutta comédì muzicala que pouré lansì noutra « lénva di queur » ver l'avin-in comme espréchón d'iverteua queulterella.

Lo spétacllo Tourna avouì mè se eunsérèi, pai, deun le nombreuze inisiateuive beuttéye eun pià pe l'Asséssorà pe soutin-in la lénva di Valdotén : lo Concours Cerlogne ; le Journées de la civilisation ; l'École populaire de patois ; lo Festival des peuples minoritaires é la revua La voix des peuples minoritaires ; lo Guetset Leungueusteucco ; lo soutièn i téatro eun patoué eunsemblo i projè Théâtre populaire ; le documantéo su le minoranse leungueusteuque Des visages et des mots ; l'iteudzo d'antropolojì Les nouveaux patoisants ; l'espozichón Les lieux du patois ; la réalizachón de livro contoù que l'an comme sujè de momàn llézeui a la sivilizachón valdoténa ; la diffujón, deun le-z-icooule valdoténe, di Dichonnéro di petsou patoésan ; lo Projè Popón ; lo premii fotoromàn eun patoué, dapertotte - téatro dapertotte ; la messa eun patoué ; lo projé que prévèi la prézéntachón a l'UNESCO d'an candidateua, eunternachonala é transfontaliéa, pe recougnitre lo patoué comme patrimouane eummatériel de l'umanitoù ; la poussibilitoù, deun lo 2012, de eunségnì lo patoué deun le-z-icooule valdoténe comme spérimentachón facultativa, pe ariì, deun le-z-àn queeun, a euntérèchì lo pi gran nombro d'icooule.

Deun sa pouleteucca, penséye pe valorijì totte le-z-inisiateuive que son espréchón de noutra queulteua, l'Asséssorà rezerve eungn'atténchón particuilléra i téatro populéro, pa mèique eun soutegnèn lo Charaban, la Fédérachon ou lo Printemps théâtral, mi étó a traver de projé spésefeucco, comme le pyise icreuite é resitéye pe recordì le fegueue de l'Abbé Cerlogne é di tsanouéno Bréan, ou La clé de la maison, dzénta espèrianse de téatro eun plase, que antisipon eun janre euncó inédì comme site di musical.

Deun lo spéttacllo no contén l'istouére de cattro méinoù, que crèison deun eun pitchoù paì de la Val d'Ousta é leur tsemeun se euncrouijon é se perdon deun le-z-àn. Euntre le momàn de djouà é de diplèizì, de déséchón é de-z-espouer, le mèinoù moirerèn leur parcour é se retrouérèn eunviéilleui deun la pise de la Val d'Ousta…