Lo fouèidé de magàn

Dz’i la fèi que le dzoun-io di dzor de vouì sachon pomì fran bièn diquè l’è eun fouèidé…
Vo-ze anchouignedde-vò di fouèidé de Granmée ?

Le femalle betoon todzor eun fouèidé desù lo coutiillòn u la jupa,
pe po s’eumpouertché, pèquè adòn l’ayòn po pe tan de dro de retsandzo.
L’î bièn pi fasilo laé eun fouèidé de tèila
pitoù que eun coutiillòn, u an jupa, que l’ion fa atò d’otre étoffe.
Pe premî baga, lo fouèidé dzoyô donque a po s’empouertché,
mi teteun, eun pi de hen lé :

Lo fouèidé dzoyô étò a la plahe di gan
pe degaé la cocotte couèizenta di pourtadjì,
bièn devàn que l’eunvenchòn di gan de quezuen-a.

Eun pi, lo fouèidé alô fran bièn pe pané le larme di mèinoù
é, tentèn, euncó pe lèi poulité lo vezadzo.

I parque di dzeleunne,
lo fouèidé dzoyô pe ramasé le-z-où.

Can l’aréô coutcheun,
le mèinoù que se bailloon lagne se catsoon dérì lo fouèidé…
L’è de lé que veun l’esprèchòn « se catché dérì lo fouèidé de mamma »

Can fèijè frè,
magàn lo revèriô su, pe se topé le bré.
Can fèijè tsô,
micque l’apreustô midjé devàn lo fornè,
se panô lo fron de la choi.

Hi bon vioù fouèidé
dzoyô étò de souflè,
can mémé lo sopatô pe fée prende lo fouà.

L’è dedeun lo fouèidé
que mamma betô le trifolle que alô quiì a la crotta,
é lo bouque pe lo fornè.

I quiourtì,
dzoyô de grebeuille pe ramasé la verdeua ;
aprì le fèizoù, l’î lo tor di tsoù.
D’èitòn,
granmée lèi catsô le pomme tsèite pe tèra.

Magàn l’eumplèyô étò pe terié foura la tourta di pomme di pourtadjì
é la pouzé su la feniha pe la léché refrèidì ;
I dzor de vouì sa néoiza étò la pouze su la feniha, mi pe la fée dedzalé…
D’otre ten, dotre couheumme…

Dze si beun po can l’eunventérèn coutsouza d’otre
Que pousuche dzoyé a fée totte halle bague
que fèijè lo bon vioù fouèidé.

Coutcheun, i dzor de vouì, poureu dî
que hen lé va po bièn, pe « l’ijène »,
vu tcheu le microbbe que pouon se catché permì lo fouèidé.

Eun réalitó,
La seulla baga que le mèinoù d’eun cou l’an acapó di fouèidé de magàn,
L’è ihó de l’amour !