Distrachón

La queunta pachense
Pe to si travaill…
N’en apésu-no de si lon fi ardzentó
A travì d’an rèya de solèi,
llouizèn, lon, preun comme eun pèi,
gropó a la tsén-à de la remiza,
terià canque i grou bouis arión.
Catro tiràn apeillà i brantse di roujì
É, a l’étatse de la toupie, d’atre tri.
Va savèi que de-z-euye,
Que de lagne,
Que de euitre é eun sé,
Que de su é bo
Atò salle patte primme, leste,
Si pansón grizaillù
Comme eun poussouar i mentèn d’eun pitset.
An cobbla de moutseillón
Dza prèizon-ì deun la tèila figna :
Eun pe mandjón é l’atro pe signa…
Te n’o beun drouet aprì to si effor !
De larme de rouzó,
Selón comme l’er vionde,
Tsizon bo de tenzentèn,
Fan sebrolé le fi llétó
Que ganton, que reseuiton,
Todzèn… la queunta reusca !
Pe pouza n’en avétchà
To si croué trimadzo.
Dèisèn t’i pasó té
A lambo
Djeusto lé
É to la décrotchà…
Damadzo !