Vagné le tsatagne

(patoué di-z-Amaveulle)

Lo tsatagnì crèi dèi bo eun plan canque ver le 1000 mètre d’otcheui su le dicllo de l’adret é canque a 600 mètre a l’eunver. La pi grousa partia di tsatagnì crèi deun la Basa Valló.

Ver la feun de sétembro, a selón di variétó, de l’otcheui é de l’espozechón, le tsatagne dza belle meuye eungnouon de tsire di plante.

Le fruì meuiron po tcheut ensemblo é pouon lèi beutté sacante senaa pe tsire tcheut. Eun cou eun ramachae le tsatagne maamàn que tsijaon pe po le queutté pe téra pequé di bitche. Pe fiye pi vitto, eungn ayè la coteumma de sequeuidre le-z-abro atò de londze pertse. Voueu lo dzor, catcheun recouille le tsatagne atò de machinne.

Aprì la récolta, eun cher le tsatagne a selón de leur caletó, de sen que eungn ou nen fiye é de leur groucheui eun partadzèn le pi petchoude di pi grouse. An partia saré dzouzua fritse caze to de chouitte, dèi sen eun beutteré sétché le-z-atre pe mioù le vardé é le medjé pi tar.

Eun cou récheutte, le tsatagne son battue pe lèi gavé la pi. Sacante fameuille le batton co a man, selón la tradichón, dedeun de saque a fourma de mandze. Eungn ommo eumbranque lo sondzón di saque é lo beuche atò lo djeusto nan su eun tron aat eun mètre.

La dérie baga que fo fiye l’è chédre le tsatagne : lèi vat an matse de pachense é, mimo se n’a de machinne que lo fan, caze todzor l’è lo queultivateur, d’eun joué veust, que partadze le tsatagne pi dzente de salle que veundrén de faèina ou beun de paatón pe le bitche.

Lé ieui n’ayè de pi de tsatagnì, le tsatagne sayàn lo medjé pi eumpourtàn, néseséo é fondemental pe nerì de fameuille euntchée. Tan de ten fé, can la tartiffla l’ie panco arrevéye eun Val d’Outa, sayàn la souye de tcheu le dzor. Selón lo santemèn d’appartegnanse a eunna comunitó é a si de partadzo, a partì di mèi de novambre, de riilla lo 11 a Sen Marteun, sisse que l’ayàn po de tsatagnì pouchaon allé ramaché le fruì dézò le plante di-z-atre.

Pe beutté eun valeur le petchoude produchón locale, la coopérativa “Il Riccio” (l’eus), de Lillianes, voueu lo dzor comme eun cou, s’euntérèche de ramaché, de chédre, de beutté sétché é de vendre le tsatagne.

D’èitón n’a eun mouì de manifestachón que son organizéye deun totta la Val d’Outa pe fiye fita eungn oneur de si fruì é baillé eun pri a la pi bon-a tsatagne de la pilachà.  

Eungn avétsèn de protso la rutse di vioù tsatagnì, vouélà sen que n’i apreui :

tan de ten fé, si gran é magnefeucco abro avouì le fleur que s’eunvertoillon

s’et eunnamouró de noutra dzenta comba. Tellamente que l’a preui rèis,

l’a beuttó su fameuille, l’a co fé an matse de mèinoù greuffo

que le dzi l’an belle adoto-le-zé.

Mi senque nen fiye de tcheu sisse croué petchou-z-étre plen d’épeun-e?

Le dzi de la Basa Valló l’an de planta trouó la soluchón.

Aprì itre itó poueundù sacante cou, le-z-àn recouillà

é, eun le-z-avétsèn de pi protso, a la feun l’an pouù vire

leur nateua veetabla : de pégne bolosse arionde é rosse

son chortue di-z-eeus poueuntù, catche tsouza de seu pai dous

que l’espouer s’è po fé atendre.

Perqué sisse croué de la planta, avouì si gou dousivvo, son viìn pe leur lo pan de tcheu le dzor,

lo medjé ésanchel pe sisse que le-z-ayàn recouillà.

Qui s’anchoueun-tì euncó de llu?

Lo vioù tsatagnì, fran si lé que di sondzón me sourì avouì se foille

denteilléye é eunvite co mé a partì couillé

catcheun de sisse pégno-z-eeus…