60° Concours Cerlogne

(patoué de Tsaensoù)

Pe l'an scolère 2021/2022 eungn a cherdù l'argumàn L’école d’avant et l’école d’après.

La fita finala de la 60ima édichón di Concours Cerlogne l'é itoù féta a Antèi, lo 12 é 13 de mi 2022. 

(patoué di-z-Amaveulle)

Magrì le-z-eumpatsemèn que la pandémì l’at eumpouzó, l’Assessorà di bièn queulterel, di tourisme, di-z-espor é di commerse l’a propouzó la 59ima édechón di Concour Cerlogne dedià i patoué.

Le-z-écoulle l’an repondù pi que amoddo é so baille coadzo : i concour l’ an partesipó 16 écoulle di petchoù, 19 écoulle primére é eunna secondére di premì degré, pe eun total de apepré 1000 écouillì.

Le cllasse l’an travaillà su lo tème prézentó « Le sondzo, le-z-étre eunviziblo é le conte fantasteuque », eun compagnì, lo lon de l’an, di-z-animachón queulterelle é lengueusteuque féte pe eun groupe de chouì animateur.

Le-z-attivitó eun cllasse son itéye accompagnéye pe de vidéó réalizéye pe le-z-esper que contaon la conta de « Ravaneun », élaborachón d’an fabla di frie Grimm « Raiponce » adatéye a eunna verchón de inque, salla de « La prisonnière de la tour » de Jean-Jacques Christillin.

Vu que la tradechonella fita finala l’a po poussù itre organizéye, pe recompensé le-z-écouillì é leur eunségnàn pe l’eungadzemèn, la compagnì téatrala Palinodie, que dèi catche-z-àn travaille a eun projé pe conté la Val d’Outa eun micllèn le déféente queulteue, l’et itéye euntsardjéye de écrie la pise de Ravaneun, prézentéye eun plen er i mèi de mi é de jeun deun le quemeun-e di-z-écoulle que l’ayàn travaillà i projé.

Tcheu le-z-écouillì é le-z-eunségnàn l’an étò resù lo livro « Lé grose fuméle » (le fenne jéante), an léjanda de la tradechón que y è deun lo livro « Merveilles dans la Vallée » de Alexis Bétemps é Lidia Philippot é pi co an cornise ieui pourèn beutté l’imadze di souvenir que lamon de pi.

(patoué dé Bretsón)

Pé l'an d'ehcola 2019-2020, l'arguemèn tserdù ou l'at ichtà Le novétà tecnolojécque én campagna.

A coza di mézeurre préze pé combate a pandémì dé COVID-2019, a féhta finala, qu'a déae sé fére é Saint-Christophe ou més dé mai 2020, a l'a pa ichtà feutta.

Un percours pé aprénde dé louénts, so dèférèn arguemèn, l'at ichtà béttà én pi pé y animatour pé garantì a continuité dou projet.

(Patoué dé Arnà)

Lo sujé pé lo travai dé l'an 2018/2019 y at ihtà Les innovations technologiques dans les foyers valdôtains.

La féhta finala y at ihtà féte a Veullanouva lo 23 é lo 24 dou mi dé mai 2019.

(patoué d'Arnà)

Pé la 56éma édichón dou Concours Cerlogne y at ihtà herdì lo téma Attraper et transmettre.

La féhta finala y at ihtà féte a Tsalàn-Dézot lo 17 é lo 18 dé mai dou 2018.