(patoué dé Tchalàn-Damoùn)
Ió i sèi l’évidentsiator é i sèi caje parfè !
Mersì mersì, ora poeu asété-vo é quiutté dé batre li man !
L’évidentsiator
Lo matériel pé l’ehcoulla
Mé troeu su li ban davó tan d’atre amich.
Ogne minà l’a lo cho ban é poon ié tramì pé travayé insémbio.
Aiteu qué bélle color qué l’in neui évidentsiator : rouza choc, ver, djano, bleu flouo, cahquiùn pi quier, cahquiùn pi fontsà !
Qué dé tchouze sin bon dé fére !
Impieu-me pé chtudié : marco tot tsen qué vo fat récordé-vo, tsen qué l’è pi importàn é tsen qu’i lanmeu dé pieu… ibio pa ren iò !
Qué dé tchouze y et pé tselle ehcoulle !
Dé ordinateur, lo tabló élettronécco, la fotocopiatrise, dé tchambre pé ié fére totta sorta dé attivité, dé bé bagn fét su mézeura pé li minà, y et finque l’achensor é na grousa sala pé damouré é fére djinàstica.
L’an dé caro li minà dou djor dé ouèi !
Dindèn y ehcoulle di vuladjo dé mountagna li minà son contùn dé mouìn,
ma l’è importàn vardé li djen su la.
Tsen qu’i fan a l’ehcoulla
É qué dé mihtre !
Eunna pé li léngue, eunna pé la sianse, eunna pé la rélijón… é mouhtron co dé mouì dé tchouze in pieu : anglè, informatécca, mùzica, é marcon tot tsen qu’i fan su lo réjistre élettronécco daoù hcrion co li minà qu’i mancon é li dévouer qu’i donon.
Co li mihtre mé impion é sèi fiér mé un pet dé tso !
Sécacó vègnon in classe dé djen qu’i cognicho pa : i son y echper qué mouhtron i minà dé tchouze fran intéressante. N’et dé tchi qué mouhtron finque lo patouè !
Ma diquiè l’è-té tsou tapadjo qu’ou mé fèi tot sopaté ?!
L’è la quiotchetta qu’a sona pé dire a touit qué l’è oura dé fére na poze !
Qué comerse !
Can fèi bontén, li minà sorton dé foura é sé damouron tanque prou. Mindjon é bèon dé bon, sécacó sé cancagnon é, can ichton dindèn, capitta qué mé campon finque pé tèra in corèn intre li ban…
Daoù van-té tchi minà ató tchi gro poùlman ?
Magara van louén dehcovrì dé noue tchouze, dé noun pocht. Magara van a féhta dou patoué, pé lo « Concours Abbé Jean-Baptiste Cerlogne ».
L’an dunì dindèn lo sac.
Pa po un co qu’i mé porton vo lor… poro mè !
É iò, curious m’i sèi, sobro tseu sondjé… Qué damadjo !