« Bondzor a tcheut ! Dze si la viille cartabla ! M’an trouó dedeun eun pailler avouì tan d’atre ravèidue d’eun cou. Voueu lo dzor, mé itto lé é me repouzo : si dza bondàn viilletta. N’i pi de sent an ! N’i fenque an corèya rontua. Va savèi can l’et accapitó… va savèi comèn… ?! Magara catcheun ara la eumplèye pe tiìn su le pantalón…»
La cartabla
La viille écoulla
« Mi teteun, senque dijou-dzo´? Ara m’anchouigno.»…
Can sayoù dzoveun-a, le mèinoù que allaon a l’écoulla me eumpléyaon pe pourté totte leur bague : la bouite di plumme, lo cair a reuggue é si a carón, lo livro « Chez Nous » é fenque eun croué cretsón de pan nir pe mandjón…
Si féte de bouque é n’i eun croué grop pe me clloure amoddo, pai totte me bague son bièn vardéye. Nen n’i eun grou chouèn !
Si itéye la cartabla d’an matse de mèinoù que, can vegnaon grou, me pasaon i seui, i frie ou i quezeun pi pégno. Jamì eun momàn pe réfié. Sayoù forta é rebeusta é, se me rontchù, pe m’arendjé bastaon eun martelet é eun cllou é… vouélà !
Si itéye la cartabla d’an matse de mèinoù que, can vegnaon grou, me pasaon i seui, i frie ou i quezeun pi pégno.
Jamì eun momàn pe réfié. Sayoù forta é rebeusta é, se me rontchù, pe m’arendjé bastaon eun martelet é eun cllou é… vouélà !
Lo calandrié scolére
Eungn allae po pi todilón a l’écoulla Le mèinoù déjaon édjé mamma é pappa, laón é lanta, padàn é madàn pe allé eun tsan ou beun pe le travaill i beui.
Renque can n’ayè pamì gran bague a fiye le mèinoù é mé no pouchaon allé a l’écoulla.
L’écoulla eungnouae lo premì otobre é levrae feun mi ; eun lèi allae di deleun canque i desando é lo dedzoù l’ie vacanse.
Lo restàn de l’an, le mèinoù déjaon allé recouillé de brot, fiye le fen, édjé a évié le tsan pe véillé can l’éve l’ie bo i caro, seité su le montequeullo di darbón ou su le catì de dreudze sètse pe le défiye, melaté le sezeleun de lasì di beui canque a la lèitie…
Le petchoù berdjé seitaon otobre é mi perqué lèi faillè allé eun tsan ou s’apresté pe l’eungnarpa.
Que de po n’i fé avouì me-z-amì pe allé a l’écoulla ! An matse de po, eun aprì l’atro !
Catche cou l’écoulla l’ie protso di mitcho, mi chovèn l’ie co preui llouèn. Eun tou ca, faillè lèi allé todzor a pià, nèi ou po nèi, plodze ou po plodze.
Que de po n’i fé avouì me-z-amì pe allé a l’écoulla ! An matse de po, eun aprì l’atro !
Catche cou l’écoulla l’ie protso di mitcho, mi chovèn l’ie co preui llouèn.
Eun tou ca, faillè lèi allé todzor a pià, nèi ou po nèi, plodze ou po plodze.
Lo tsemeun pe allé a l'écoulla
Vo v’ide d’estrà chanseu d’avèi si dzen poulmeun to dzano !
L’ie beun pi co plézèn ité tcheut eunsemblo é, se lo tsemeun l’ie lon, no no édzaon euntre no é no no féjaon compagnì.
D’éforié, le megnotte s’arétaon couillé de fleur pe nen fiye de bosquet é le pourté a la métressa. Lo queun bon flo ! Le megnó recouillaon de brantseillón sèque é de bocón de bouque tri pe catché i fornet que étseidae l’écoulla.
Can n’ayè bondàn de nèi, me eumpléyaon comme ledzón ! Sayoù an « ledzabla » ou eun « cartablón », tchica cartabla é tchica ledzón !
« Ommo, vitto ! L’écoulla eungnoue tostoù. Avétséde lo cllotché : marque belle caze nou euye ! La métressa l’è dza lé que attèn. »
Tcheut i veladzo pourtaon respet eunver la métressa é tcheut la saluaon é lèi
baillaon di vo. Pe le mèinoù, la métressa l’ie salla que sayè tot, l’ie grecca, nen n’ayàn crente, mi la lamaon bièn.
