Clic cloc, clic cloc… lo queun tapadzo no fièn su lo solàn !
Bondzor mèinà, no dave no seun le soque é no alèn eun cobbla. No seun férée ató de brotse, paréi no derèn de pi é d’ivé no colatèn pa desù la llase. N’eun de bo sepón de boouque de fréino é lo desù l’é de péi de modze avouì de corèye de couée.
(patoué de Vagrezentse)
No sian booue pe le feillette é pe le garsón que alaan a l’écoulla a pià a tcheu ten é no vardaan i pià to lo dzor. Atro que le pantoufle !
Eun éitchèn de dézó su, no véjaan de faoudéi pe pa queuntchéi le dra, de ribàn i collette é su le pèi di megnotte.
Que de lambo no fijaan de miéidzor a da-z-aoue !
Apréi avèi medjà sen que tsaqueun l’èyé portà de mèizón deun lo baraqueun, le-z-ecoilléi sian libro é paréi poujaan galopéi é dzoyéi deun la cô é adón oué que no socalaan.
Accappa-mé !
Qui l’é catchà l’é bièn catchà !
Dzoyèn i botón !
Saoutèn a la corda !
Fièn semblàn d’isséi de contrebandjéi !
Saoutèn deun le carón !
Devàn que chortì, le mèinà, a bitor, apropiaan la tsambra de l’ecoulla : coouaan, gavaan la poussa, eumplijaan le botéillón d’entso, beuttaan tchica
tot eun caro.
A cattro é djemì eun tornaa ou méicho.
Caque coou le mèinà l’èyaan étó de devouer que la metressa l’èi baillà… pa comoddo, caqueun dèijé aléi eun tsan ou féye d’atre travaillot.
É no ? No, no socalèn !
No no repoouzèn maque de nat, can tcheut drumon.
Poouzée, le-z-eunne a cotéi di-z-atre, sovèn no accapitte que d’ivé no troouon belle apeillée i larpéi, due dzalée.
L’é mangagnèn no tsaouchéi é que fret i pià !
