Aitsooude-mè, veuo de bague dz’aruo a fée !
M’an baillà non LIM, tabló onteratif multimédial, queun non omportàn !
Méinoo, ivrooude amoddo le bouinno é surtoù le jeue !
Lo tabló onteratif multimédial
L’ecoulla tecnolojique
Avouéi mè vo pouooude nadjè su eunternet, aitchè de joulie-z-imadze, llére totta choo de noelle é acoutéi la lehón que le métre l’an aprestoou.
Vo pouooude fénque m’icriye desù avouéi la plumma dijitala.
Todzèn, piotro me fiooude gateuille !
É tcheu me comandon : le-z-ordinateuo, le tablette, fénque le portoblo. É tcheutte tsertson. Tsertson de totte : su le sianse ou la jéografì, su l’istouére...
N’i an reponsa pe tcheutte é pe totte... caze.
La récréachón
Méi dequè acapitte ? M’an quetoou séi to solette. Ieui son le méinoo ?
Ara me iàn on dèèn : l’è non-a é son tcheutte aloou medjè a la refechón é que fan ! Dequè lai saè-téi de bon ?
To l’è itudjà esprése pe medjè san. Le soye le-z-apreuston le quezeun-éile de
l’ecoulla, méi, lo pi soèn le porton de ià, dza belle preste.
Lai son oncò de madamme que vèillon que le méinoo medzèyan amoddo,
que se fachan poou de moou canque i momàn de tornéi on hllasse.
Que joulia la récréachón !
L’è an joulia poouza pe argoillè defoua u dedeun, can féi crouée ten.
Don lo proo dèèn l’ecoulla ll’a fénque de djouà esprése pe amuzéi petchoou é groou : de gante, de tobogàn, de queuo parcoo pe rampegnè, méi teteun le méinoo lamon oncò preui argoillè a queuque u a s’accapéi, comme on coou.
L’ecoulla l’è tsan-ée
Driiin !
Torna si son que chordelle !
L’è cattro é djeméi de l’apréinon-a é la dzornoou a l’ecoulla l’è belle tsan-ée, pe ouì. Tsaqueun apreste son sacque.
Véyooude de po oubliè ren é de prende sen que dzoye pe fée le devouèa a méijón !
Queuttooude lo ban eungn odre : le fenne que veugnon nétèyè lamon poou acapéi le bague que tréinon pertotte.
Asegnooude-vo-zè de me débrantchè dèèn que saillì !
Tohooude le pantouffle, onfelooude seulle joulie botte que vo-z-aide don vooufra petchoouda credense é ià, tcheutte a méijón !
Ll’a l’ecoulla bus é to plen de machinne que vo-z-attègnon.
Queun trafio !
Canque a demàn, méinoo, é todzò degourdì !