(patouè de Vagrezentse)
Tsaque an, l'Assessorà organize, eun collaborachón avouì lo « Centre d'Études Francoprovençales René Willien » de Saint-Nicolas, lo Concour Cerlogne : la premiéye édichón l'é issée féite l'an 1963. Si concour euntérèche tcheu le-z-àn eun bió mouéi d'écoilléi di-z-ecoulle maternelle, élémantére é mouayenne de la Réjón méi feunque d'atre llouà, eun témouagnadzo que lo territouéro leungueusteucco francoprovansal chor di confeun de noousa Valléi : partesipon a si concour étó de cllasse de la Savoué, dou Valais, di valléi francoprovansale dou Piémont é di communotéi allofone de Faeto é de Celle di San Vito de la proveunse de Foggia.
Son but l'é si léi de pouchéi le-z-écoilléi a la retsertse di documèn eun patoué que féyon partia de la tradechón orala, su un tème que conserne la sivilizachón alpestre é que tsaque an l'é diferèn, é de stimuléi l'eunteré di novéye jénérachón eunver lo patoué.
Lo Concour Cerlogne euncomenche avouì dave dzornà de préparachón é de formachón pe le-z-eunségnàn que son euntéréchà.
Lo lon de l'an scolére le métre é le-z-écoilléi réalizon de-z-enquéte eun tsu le parèn, le granpéye ou le granméye, ...To lo matériel recouillà (vioù documèn, fotografie, objé, témouagnadzo oral, ...) l'é organizà, analizà é lo rezultà de la retsertse pou isséi prézentà dézó la forma d'eun album illustrà, d'eun Cdrom, de cassette a acoutéi é a avéitchéi... Le travaille son conservà ou « Centre d'Études Francoprovençales » ioou pouon isséi consultà.
Pe fenì, ou mèi de méi, tcheu le partésipàn se retroouon pe tréi dzor a l'occajón d'eunna bala féisa de clloouzura organizée, tsaqueunna a son tor, de eunna di queméye de la Val d'Ousta.
