Néolojisme
Eun mot de résanta créachón ou pritoù, dèi pocca ten, d'eungn'atra lenva, ou bièn l'assettì l'euntroduchón nouila deun vioù mot, l'è eun néolojisme.
Eunterféranse
N'at eungn'eunterféranse can lo sujé que predze doe lenve eumplèye deun la lenva A eun tré fonéteucco, morfolojeucco, lessical ou seuntatteucco carattéristique de la lenva B. L'eunterféranse l'è eundividuella é pa voulua (ex : so tchentre pa).
Prito
N'at eun prito leungueusteucco can an lenva A eumplèye é fenèi pe euntégrì eungn'ounitoù ou bièn eun tré leungueusteucco que ezistèye deun an lenva B é que A l'ayè pa. Lo prito l'è eun fénomène sochal é leungueustecco lo pi eumpourtàn deun tcheu le contà di lenve, tsaque cou que n'at an personna que se servèi totalamente ou eun partia di dou prèdjì diffièn. An lenva comme lo fransé l'a pritoù lo lon di siéclle, é mimo i dzor de oueu, de mot di lateun é di grec pe eunretsì lo vocabuléro de la medesin-a é de la tecnolojia. De prito arrevon étó de l'angllé surtoù pe sen que regarde le termo poleteucco é di spor (ex : lo tennis, lo golf, l'ape...).
Calque
Eun calque leungueusteucco se vérifie can, pe baillì non a an noua nochón ou bièn a eun moublo, la lenva A tradouèi eun mot seumplo ou compozoù, que l'et d'an lenva B ou d'eun mot seumplo, que éziste dza deun la lenva A ou d'eun mot compozoù pe doe paolle que ezistaon dza deun la lenva A (ex : fae le corne).