(patouè de Veullanoua)
Le « Journées de la Civilisation Valdôtaine- Culture et diversités » son lo rezultà de la volontó de euncoadjé an discuchón, de tourna ivrì eun débà, de reprendre la refléchón su la sivilizachón valdotèna comme prèiza de couchihe é de cougnisanse di conteste deun lo sanse pi lardzo di terme.
Le-z-écouillì é le-z-eunségnàn que l'an prézentó leur traille é le-z-àn beuttó a dispozichón de tcheutte - eun féyèn nihe eungn étsandzo a nivó di prateuque didateuque é de l'espérianse - é, surtoù, que l'an refléchì su hen que l'ou dii « fée de la Civilisation », l'an demouhó que hi sujé se prihe i refléchón le pi atuelle deun lo domène de l'eunsègnemèn é de la pédagojì é que, a traver la Civilisation, l'è poussiblo developpé lo sanse de la sitouayèneté é de l'appartin-ensa a an comunitó de dzoun-ino : la proua, se ho l'è nésesséo, que la Civilisation va i de lé di folklore é pou ihé eun parcour de traille euntéressàn pe caratérisé l'ecoula valdotèna.
La reorganizachón é l'otonomì de l'ecoula, l'idó de eungn'« ecoula-eumprèiza », la globalizachón, la crize di viille valeur que son po reustéte reumplachéte pe d'otre pi atuelle, la retsertse é l'attenchón pe l'estèrieur no-z-ayón pourtó a beutté tchica de coutì an partia eumpourtanta de nouha via d'écouillì, mimo se heutta partia reprézentoo eungn aspè eumpourtàn de nouha sosiétó. Saì retroué é, surtoù, renouvélé nouha tradichón queulterella, to comme le poueun for de nouho eunsègnemèn é di nouhe capasitó de pensé le projè : vouélà eunna di valeur fondatrise de nouha ecoula, que l'è étò eun di grou défì pe le capasitó di-z-eunségnàn.
Le tsandzemèn que l'an carattérizó hisse dirì ten - é po djeusto deun lo mondo de l'ecoula - no-z-obleudzon a pensé é a beté eun discuchón le stratéjì, le prioritó é le-z-orientachón a choure.
Pourtàn, le moumàn pi defesilo pouon se trasfourmé deun de-z-occajón pe repartì, di poueun de vua po djeusto économique, mi étò queulterel, bièn plantó su la tradichón é accompagnà pe le souè de la sosiétó. Mimo se l'è eumpourtàn que le Valdotèn le pi dzoun-io sissan iver ver l'Oroppa é lo mondo, dèyon eun mimo ten cougnihe le rèise le pi afón que le ren attatchà i leur orijine : lè pe ho que dèyon cougnihe le-z-orijine de leur sivilizachón é crèihe leur sanse d'appartin-ensa a leur comunitó, to comme eun for santimàn idantitéo.
Le lenve que s'eunsègnon a l'ecoula marcon l'orijinalité de la situachón valdotèna é son de-z-eumpourtàn mouayèn i servicho de nouha idantitó. L'euntroduchón facultativa di patouè a l'ecoula contrebouiye po djeusto a la diffujón de la queulteua mi reunfourchérè euncò l'euntégrachón di-z-écouillì.
Vouélà le baze di programme di Journées: eun rappor pi éhè avouì lo territouéo, la valorizachón é la diffujón di boun-e prateuque deun le-z-écoule, la produchón de matériel é de-z-eunstrumàn didatteuco, lo recour i noue tecnolojì, la mezeucca, l'iconografì, l'utilizachón di propozichón queulterelle réjonale é la leur différenchachón eun fonchón di difièn odre d'ecoula.
