(patouè de Vagrezentse)
La planéta que donte si signe l'é la Leunna, l'élémèn l'é l'éive.
Lo Solèi passe deun si signe euntre lo 22 de joueun é lo 22 de juillet.
Couleur : lo blan.
Péra de la chanse : la perla.
Métal : l'ardzèn.
Dzor de la chanse : lo deleun.
Caratéro
Sit l'é lo signe de la maternitéi, de l'ostinachón, di sentimèn pi profón, de la melancolie é de la radze. Le personne de si signe son bramèn émotive é l'an eun sans de protechón bièn for é marcà eunver la fameuille. Toteun, can lèi fa se confrontéi, la coseumma l'amon mioù se gavéi é se catchon, paréi comme féi l'écrevisse dézó le rotse. L'an an memouéye de fér é collechoron totta sor de bague. Vu que l'é eun signe d'éive, l'an fata de se boudjéi. L'é lo signe de la via.
L'é eun signe defesillo é eun mión mistérieu. Viquì euntre dou mondo : si léi de « defoura », vu comme danjereu é a crende, é si léi de « dedeun », dzeublo de memouéye, de fantazie é de sentimèn. L'Écrevisse se troouve deun eun équilibro stablo euntre le dou mondo : can la réalitéi l'é grama d'avanse, se catche deun lo demàn é se souéte que le sondzo pouèyan eun dzor iérì réalitéi. Lo demàn l'é sa protechón.
L'é bièn for lo lièn avouì la méye. La fameuille (seurtoù salla d'orijine) é le mèinà saràn todzor a la premiéye plase. Paréi, se deside de se mariéi, lo féi pi que d'atro pe se féye eunna fameuille. La fameuille reusteré todzor pi eumportanta que l'ommo ou la fenna. Eun particuliéi le fenne Écrevisse se senton pi méye que fenne : feunque apréi lo mariadzo, vardon leur esprì maternel eunver la fameuille d'orijine.
Seutte personne, que semblon pèizible é sensa gneun tracà, catchon amoddo eunna personalitéi bièn refléchissenta. L'amon voyadjéi, seurtoù pe mer. L'Écrevisse l'a eun amour eunfenì pe sa mèizón, pe son péì, pe se pantoufle, pe sa mezeucca. Sa sensibilitéi l'é devàn to maternella, l'a crente que le-z-atre la féissan passéi é pou iérì bièn preucca.
Sa timidesse la porte a isséi pitoù eunradjée, to so maque pe se defendre. L'a bièn d'ambechón méi la catche, sovèn acappe senque l'ou maque deun la seconda mèitchà de sa via.
L'Écrevisse l'é bièn douse, fidéle (seurtoù eunver se-z-amì), avouì bièn d'ispirachón, queulteura é eunna memouéye estraordinéra.
Son caratéro tchandje to di lón, son cor cren le variachón dou ten.