(patoué di-z-Amaveulle)
Devendro lo 8 de novembro 2024, a 6 euye di nite, deun l’éillize de Sen-Loràn eun Veulla, veundré iverta l’espozechón doquemantére Alléde vire su lé. Témouagnadzo 1943-1945 eun Val d’Outa, réalizéye pe la Streteua Espozechón é promochón de l’Identitó queulterella de l’Assessorà di-z-ativitó é bièn queulterel, di sistémo éducatif é di poleteuque di relachón eunterjénérachonelle.
L’espozechón s’eunscrì deun lo cadro di sélébrachón di 80 an de la Rézistanse, de la Libérachón é de l’Otonomia, voulue é soutigne pe la lloué réjonala 14/2023 aprouéye pe lo Conseill réjonal de la Val d’Outa.
To lo lon di veuntedae-z-étape de l’espozechón, si que la vezeutte saré eunvitó a fiye eun voyadzo de memouée grase a eunna cherdua de doquemèn que no veugnon di-z-archive réjonale. La conta se prézente avouì an dobbla dimenchón de ten, eun partèn di momàn de comémorachón pe arrevé, eungn allèn a requelón, a sen que l’et accapitó é i dzi qu’eungn ou rapélé. La comunicachón l’è féte deun tri lenve eunsemblo : l’italièn, lo fransé é deun le déféèn patoué de tsaque llouà.
Sen que l’espozechón l’ou baillé eun pi, l’è la possibilitó d’acouté le vouése di témouèn grase a de-z-eunrejistremèn vardó i-z-archive réjonale, prézèn deun la séchón Queulteua di sito patoisvda.org ieui eun pou allé atò lo QRcode plachà su le pannó de l’espozechón.
Alléde vire su lé. Témouagnadzo 1943-1945 eun Val d’Outa
Éillize de Sen-Loràn
Plase de Sent-Or – Veulla
di 9 de novembro 2024 i 8 de jeun 2025
Iverta di demars a demendze, de 10 euye a 1 euya de la dèinon-a é de 3 canque a 6 euye de l’avépró
Entrada libra.
Pe vo euntervé de pi :
Réjón otonomma Val d’Outa
Streteua Espozechón é promochón de l’Identitó queulterella
Tél : 0165 275937
u-mostre@regione.vda.it
