(patoué de Veullanoua)
Tourne su lo palque lo collettiffe Patoué eun Mezeucca atò eun spétacllo dédià i patouè, organizó eungn ocajón de l’édichón 2024 di Printemps en musique. L’évènemàn queulterelle, sostchan-ù pe l’Assessorà réjonal Bièn é attivitó queulterelle, Sistème éducatif é Poleteuque pe le rélachón eunterjénérachonelle, propouze an sériye d’iniziative llézue euntrì leur atò lo fil rouge de la mezeucca é de la valorizachón di patrimouéno muzical de nouha réjón.
Teuria foura la lenva, hi lo titre di conser propouzó pe l’eunsemblo francoprovensal, se propouze de fée dequevrì é redequevrì lo patrimouéno leungueusteucco de la Val d’Ouha é de souligné la vitalitó di patouè é sa capasitó de conté la via é le-z-émochón de tsaque dzor.
Lo randévoù l’è, donque, pe devendro 21 jeun a 20h30 a la Cittadella dei Giovani de Veulla.