(patoué di-z-Amaveulle)
Seutta séchón di sito vo guederé a travì le matériel de l’espozechón “Allez voir là-haut. Témouagnadzo 1943-1945 eun Val d’Outa, sognéye pe lo BREL (Buró réjonal etnolojie é lengueusteucca) de l’Assessorà ativitó é bièn queulterel, sistémo éducatif é poleteuque pe le relachón eunterjénérachonelle, eun collaborachón avouì lo Guetset Lengueusteucco Francoprovansal que, atò l’édzo fondemental de se témouèn su lo territouéo, l’a fé le traduchón di soutitradzo deun le déféente variante de patoué é étò la trascrichón di témouagnadzo oral eun patoué avouì leur traduchón eungn italièn.
L’espozechón recouille de-z-imadze d’eun cou que l’an an grousa valeur é de memouée contéye é vardéye deun le-z-archive di BREL, de doquemèn euncontournablo pe rebâtì eunna di padze pi defesille de noutre-z-àn : la guéra de Libérachón.
L’espozechón moutre po maque la périodda di 1943-1945 eun Val d’Outa, mi l’out euncó pouché a mezaté su la costrechón di memouée di llouà. A travì le témouagnadzo, euntre le-z-achón de la Rézistanse é le reprézaille nazifachiste, chor foua lo souvenir de seu que l’et accapitó é di-z-ommo é fenne que l’an partisipó, antifachiste, partidjàn ou sivillo, é comèn sisse souvenir son itó tramandó pe le dzi deun le-z-àn aprì la Libérachón.
L’espozechón se moutre, comme seutta séchón di sito, eun 22 étape. La conta se développe deun na dobbla dimenchón de ten, eun partèn di momàn di souvenir pe allé eun dérì canque a sen que l’et accapitó é a leur protagoniste qu’eun rapelle.
Seutta séchón virtuella l’è penséye comme eun parcour complémantéro a la vezeutta réella de l’espozechón. Mersì i multimédià, baille la possibilitó d’acouté rendjamente le vouése di témouèn, eunsemblo i trascrechón é i traduchón eun fransé, italièn é patoué.
Eungn esplorèn seutta séchón, v’èi l’oportunitó de entré deun l’istouére a travì le paolle de sisse que l’an vequi-la, eun vardèn pai eun viya la memouée d’an périodda capitala pe la Val d’Outa é pe totta l’Italie.
