(patoué de Tsaensoù)
Dèi lo Mouayèn Adzo tanque a la feun di XIXo siéclle, le trasfourmachón économique é sochale di comunotì de campagne son itaye bièn pocca é churtoù pocca eumpourtante pe rappor i bouleversemèn que n'en vequì deun sisse dérì siéclle.
Lo patoué, pe tan de ten, l'é reustó la pi eumpourtanta lenva de communicachón euntre le dzi di veulladzo que reprézentèyon la gran partia de la populachón valdotèna. Oueu, la lenva reusque de pèdre se carattéreusteuque, mi étó de disparétre, a coza di trasfourmachón économique, sochale, poleteuque é queulterelle que l'an portou-la a itre pi icartaye pe rappor a l'italièn, i fransé é a d'atre lenve euncó.
Pe la sovegardì, l'è eumpourtàn de mantin-ì é de omentì lo numéró di locuteur, mi étó de conservì le caratéo fondamantal é la puretoù min-achaye pe le-z-euntérféranse de l'italièn, pe le frécàn eumprito di paolle italienne é étó pe la diffiqueultoù d'adattì lo patoué i nouile ézijanse de communicachón.
Lo patoué l'è l'espréchón di valeue leungueusteuque é queulterel que pouon pa itre ramplachà ; meeutte d'itre sovegardoù deun se spesefesetoù formelle é semanteuque. Eun tegnèn contcho que le-z-eunterféranse é le contaminachón son, la coutimma, eunversemèn proporchonelle a la cougnissanse d'an lenva é i sousì de mantin-ì sa puretoù, fa trouì de soluchón que reumplèison lo vouiddo di paolle que mancon é, i mimo ten, fa se pouzì lo probléma de sen que se pou féye pe combattre contre le contaminachón que vegnon de defoua.
La prateucca di patouè no pourte tcheu le dzor douàn seutte situachón de contaminachón que no féyon pouzì de dimande.
- L'è-tì poussiblo prèdjì eun bon patoué ?
- Arreven-tì euncoa a mantin-ì la retsesse, de cou iton-anta, di vocabuléro lléttoù a la campagne ou bièn fa-tì assetté la perte d'eun patrimouéno leungueusteucco péqué correspón pamì a la réalitoù ?
- Pouen-tì imajin-ì de mouayèn (académie, achón d'éducachón, recour i médià...) que baillissan de consèille pe eungn uzadzo pi djeusto de la lenva ?
- Queunta magniye fa adotì eunver la modernizachón di patoué : condannachón ou toléranse ?
- Doyen-tì resté contèn que lo patoué conserve, eun tchi no, euncoa an via que deun d'atre zone son allaye perdiye, ou bièn no fa itre pi creteucco eunver le déformachón lessicale, fonéteuque, morfolojeuque é seuntatteuque ?
- L'è-tì euncoa poussiblo féye vivre eunsemblo le-z-ézijanse d'uzadzo é de comoditoù de oueu avouì lo respé de la fourma ?
No créyèn fermamente deun la nésessitoù que lo patoué pouèye vivre é contegnèye a reprézentì eun di-z-aspé le pi-z-eumpourtàn di particularisme valdotèn : a partì de so, l'ézijanse d'eun prèdzì attuel, que repóndèye i multiplo néséssitoù de la sochétoù contamporène, mi étó d'eun prèdzì que perdèye pa son idantitoù é qu'anèissèye pa deun lo paoutì di-z-espréchón eumpritaye i-z-atre lenve.
Que fa-tì féye adón ?
