(patouè d'Euntroù)
Lo preunsipo fondamantal de nouha grafiya se baze su eungn'idó i mimo ten seumpla é novatrise : imajin-é eun sistème que permètuche a tsaqueun d'écriye son patouè é, i mimo ten, de llire amoddo lo patouè de tcheu le-z-otre. Mersì a hi sistème, flèsiblo é universel i mimo ten, no aréèn a rendre a l'écrì, avouì eun degré de présijòn asètoblo, la grousa variétó de nouha lenva prèdjéye. Lo sistème eumplèye le-z-otomatisme de la lenva fransèza é coutche grafème particulié, pe écriye renque hen qu'eun prononche ; caze tcheu le sembole eumplèyà di sistème son dispouniblo su eun normal clavié d'ordinateur.
Grafème particulié
No repourtèn hé damòn coutche son particulié avouì leur grafème corespondàn (pe la lista completta consultedde la greulle di « Correspondanse euntrì son é grafème » que se troue dedeun le-z-annexe.
Assàn toneucco, u « d'euntensitó »
No marquèn l'assàn toneucco renque su le mo oxitòn que fenison pe vouayella, pe « m » ou pe « n ». (pe d'otre cas pitoù rèa, consultedde la fiche « Asantuachón » que se troue dedeun le-z-annexe).
L'assàn toneucco pou ihé :
- 1) eungn assàn grave, égù ou sirconflexe plachà su la vouayella eun pozichòn toneucca [calétà(qualité),mèinoù(enfant) ,pourtó(portail),mentòn(menton),arbéillemén(habit)]
- 2) lo grafème «eu» dedeun lo cas de «e» meutto [courajeu(courageux),malereu(malheureux)]
