(patoué di-z-Amaveulle)
N'eun pocca de novéle di répertouéro mezical d'eun coou. L'é probablo que eun tsantaa de tsansón a la modda de Tereun ou de Paris, seurtoù eun fransé, caque coou eun italièn é, beun cheur, feunque eun piémontèis. L'é maque avouì lo Charaban que s'aprooue de beuttéi eun valeur la tsansón eun patoué.
Debilavàn, l'istouére de la tsansón eun patoué eun Val d'Ousta l'é eunna istouére dzeubla de vouiddo é can méimo résanta. Le vioù teste eun francoprovansal son rére. Le premiéye retsertse, féite de Favre é Tibaldi a la feun dou XIXe siéclle, no lo atteston. Cerlogne méimo no féi savèi que La fenna consolaye l'ie tsantée a l'épocca de son pappagràn, é sen l'ou déye ou comensemèn dou XIXe siéclle... Méi llu méimo l'a travaillà pe eunretsì lo répertouéro valdotèn eun icrièn le teste de caque tsansón.
De tsan novéi son arrevà deun lo répertouéro de magnéye diferènte : sensa la reusca de trompéi, no pouèn imajinéi que le fèire é le martchà son issà eunna booua occajón d'étsandzo de mezeucca. Apréi avèi conclù eun bon afféyo, eun vèiro de veun, eunna dzenta tsansón é eun poujé fijéi la patse, é le-z-artiste de tsemeun mancàn cheur pa deun seutte groouse manifestachón que ramassàn an matse de dzé.
Eun Val d'Ousta, téra de passadzo, le-z-euncontro avouì le voyajeur é le pelereun l'ian pitoù diffujà. Le Valdotèn méimo, comme la granta partia di populachón di-z-alpe, l'ian de voyajeur : émigràn pe de londze périodde eun tchertcha de travaille (ramoneur, ressàn, masón, sabotiéi, brèissàn, quizeur de mada, eunstituteur, etc) é, can tornàn a mèizón, avouì leur petchoou magò, portàn étó de mélodie novéye[i]. Di premiéi chansonniéi valdotèn publià rezulton caze pa de tsansón eun patoué[ii].
L'é euncó eun coou René Willien, avouì d'atre amì, que neun comprèn l'eumportanse é se beutte a recouillì le tsansón eun francoprovansal que féyon partia de la tradechón[iii]. Dèi si momàn, deun si secteur, n'a de groou tchandjemèn. L'an 1951 l'é lo premiéi an di Floralies[iv], randévoù annuel di corale valdoténe que propozon ou pebleuque, todzor bièn nombreu, eunna partia de leur répertouéro que s'eunspire de la tradechón, méi que pren étó eun considérachón de tsansón novéye, seurtoù eun patoué. La manifestachón l'é eunrejistrée é, eun partia, publiée. So beutte a dispozechón dou pebleuque, é de qui se voille lamèye tsantéi eun compagnie, de sourse novéye. Pa totte le tsansón propozée veugnon populére. Pe caqueunne, dze penso eun particuliéi i tsansón de Pignet é dou tsanouéno Jean Domaine, lo sussé l'é can méimo estraordinéro, ou poueun que seutte tsansón son-pe tsantée deun an matse d'occajón comme de tsansón folclorique, sensa que le tsantre se rendèyan contcho que son eun tren d'eunterprétéi de tsansón d'eun oteur contemporèn.
D'euntor la feun di-z-àn sosanta, avouì la diffujón de la televejón, no assistèn ou trionfe dou rock and roll, apréi di cantautori, di Beatles... é eun sertèn detatchemèn eunver la tsansón tradechonella totche la jenesse. Eun'idà novéya, pocca pe coou, s'épatte deun le llouà pi sensiblo... Codéye pa compozéi de tsansón « moderne » eun patoué, comme euntégrachón é attualizachón de la tradechón, perqué la jenesse pouèye se recognéise ? Le modélo son le tsanteur dou momàn, fransé é italièn. É, pe Magui Bétemps (1947-2005)[v], son seurtoù le-z-oteur que tsanton le probléme di minoritéi leungueusteuque : lo catalàn Llac, l'ossitàn Marti, Gilles Vigneault dou Québec, Robert Charlebois é Felix Leclerc, lo basque Imanol, le bretón Servat é Glenmoor, l'alsasièn Siffer... Lo ban de prooua pe seutta novéya aventeura l'é, euncó si coou, lo téatro eun patoué. Deun le-z-àn 1971-72, Magui Bétemps, avouì Graziana Loro-Piana de Saint-Pierre a la guitara é Pierre Aymonod a la flouta, prézente le premiéye tsansón « moderne » (eun fransé) deun le momàn de poze di spétaclle de la compagnie téatrala de Saint-Pierre. L'an 1974 d'aoutón, a Tsaseillón se forme eun nouo groupe téatral. Pren son non dou Santre queulterel que l'é a son orijine : La Veillà. Magui l'é eun di fondateur é partesipe a la redachón orala di premiéye piéise. Eun pi, icrì de tsansón que l'an la fonchón de commentéi la conclujón de tsaque petchoou sketch : Pappa Gran, Djodjé lo pion, Pèina é radze di Valdotèn[vi], La réserva. Méi Magui tsante pa pe La Veillà : eunna grossesse defesilla la obleudje a la coutse é a prendre sa plase l'é Maura Susanna de Sen-Veunsèn. L'é paréi que comenche, a l'ombra dou téatro populéro, lo parcour de seutta tsanteuza estraordinéra que dzoye-pe eun rolo priméro deun la diffujón é la cougnisanse di tsansón de Magui é de la tsansón eun francoprovansal. Ou méimo ten, caque senar devàn ou caque senar apréi Magui (probablo que no lo seun-pe jamé méi sen l'a pa d'eumportanse), Luis de Jyaryot d'Ayas compoze se premiéye tsansón eun patoué. Le prézente ou pebleuque pe lo premiéi coou a l'occajón d'eun resital organizà pe l'Arpitania ou colèdzo Gervasone, l'an 1975. Jyaryot débute ioou La Veillà s'apreste é resite se piéise. Magui é Luis se cougnison pa é maque caque mèis pi tar l'an la possibilitéi de s'euncontréi. Fa penséi que l'idà d'eunna tsansón valdoténa « eungadjée » l'é « deun l'er » é atèn pa d'atro que lo passadzo de la personna djeusta, comme sen acapitte caque coou... Magui queutte de tsantéi eun pebleuque l'an 1977, Maura é Luis contenuon avouì bièn de sussé leur tsemeun arteusteucco. Luis, nèisù comme tsanteur de l'Arpitania[vii], iàn eun pocca ten lo tsanteur patouazàn pi populéro de la Val d'Ousta.
De sa par, Enrico Thiébat (1949-1992) queur jénéreu,, anarchiste, cabarétiste capablo é plen d'esprì, ménestrel inreverèn, l'èi compozà étó de tsansón satirique eun patoué, a cotéi de teste eun italièn é eun fransé. Mor trajiquemèn, son souvenir l'é conservà avouì jalouzie de se nombreu amì é admirateur. Le Trouveur Valdotèn néison d'euntor la feun di-z-àn setanta itor de la fameuille Boniface é se prézenton avouì eun resital de tsansón de Magui. Deun lo ten tchandjon, se modifion, se renouvellon canque a prendre lo tsemeun de la retsertse mezicala que le féi-pe cognéise méimo a nivó eunternachonal. Leur répertouéro attuel l'é fa de tsansón é de mezeuque de la tradechón di-z-alpe. Eun méimo ten Cesare Marguerettaz comence eun'attivitéi mezicala que mooure-pe, a traver de-z-espérianse differente, deun eun eunteré pe le tsansón é le contine pe le mèinà eun patoué[viii]. La premiéye vaga de tsanteur eun francoprovansal s'aplante énque é fa attendre canque i-z-àn nonanta perqué d'atre tsanteur se fièyan cognéise. L'an 1995, Christian Sarteur, adéràn ou mouvemèn di-z-Eundépandantiste Valdotèn, d'Ayas comme Jyaryot, édite Val d'Aohta libra, recueuill de tsansón poleteuque. S'eunsère donque deun lo méimo tsemeun de Luis é de Magui. Fa attendre lo novéi meullenére pe eunna noua tsanteuza eun patoué : Yvette Buillet, feuille d'eun comédièn de la compagnie d'Euntroù que l'a baillà eunna groousa contribuchón ou mouvemèn téatral valdotèn. Comenche a tsantéi l'an 2007. Icrì de tsansón eun patoué é prèidje de sujé valdotèn moderne, feunque eun rap.
Tradouì de : Bétemps Alexis, « Le Théâtre et la musique », TRENT'AN de PRINTEMPS é TAN d'ATRO, Musumeci S.p.A., Quart, 2010.
[i] Bétemps Alexis, Hommage à la Kinkerne, « Nouvelles du Centre d'Études francoprovençales René Willien », n° 51, 2005.
[ii] 1912 : Chansonnier Valdôtain, édità pe la Ligue valdôtaine ; 1932 : Trèves Joseph, Valdôtains, chantons ! ; 1949 : Berthet Aimé, Chansonnier Valdôtain.
[iii] Pignet Amédée, Vuillermoz Luigi, Willien René, Valdotèn, tzantèn !, ITLA, Aoste, 1957.
[iv] Nèisue comme Concour Réjonal de Tsan Coral, le Floralies l'an tchandjà bièn de coou de non. Vouéi l'é eunna groousa manifestachón que réunì, pe caque dzor, de meulle é de meulle personne.
[v] Maria Rita Maquignaz, son vrèi non. A l'épocca, devàn que la reforma de l'étà sivil, le fenne mariée vardàn lo non de mèizón de l'ommo. L'é paréi que Magui (comme l'èi comenchà a lèi déye Pierre Grosjacques) l'é cougnua comme Bétemps, son non d'époouza.
[vi] L'é la traduchón eun patoué de Tsaseillón d'eunna poézie dou poéte chilièn Pablo Neruda.
[vii] Lo Mouvemèn Arpitàn publie feunque le teste de se tsansón : de Jariot Luis, Li canson de nohtro peplo, 1976.
[viii] Laripionpion, Assessorà de l'éducachón é de la queulteua, 2009.