(patoué di-z-Amaveulle)
Eun montagne l’è la nateua que déside le momàn de la via. Lo tsandzemèn di coleur, l’er que veun pi fret, le premiye nèi su le bèque é le tsaléque dzanasù anonson la feun de l’étsatèn é l’èitón que areuve. L’è belle dza la feun di mèi de sétembro, lo 29 selón la viille tradechón valdoténa Sen Bernar le pren, Sen Metché le ren é comme todzor l’è la dézarpa. Le-z-armaille bèison bo di montagne ieui sayàn montéye ver la feun de mi ou entràn jeun, é tornon deun le beui bo eun plan.
Tramé to lo megnadzo l’è co preui complecó : la préparachón eungnoue di mouente an senaa devàn que partì. Fo queé amoddo lo beui, lavé le vatse, broché le cue é llouistré le pi dzen caró. Dèisèn, selón la tradechón, fo nommé le rèine de la montagne : salla que l’a gagnà totte le bare é salla que l’a baillà pi de lasì. Totte dave son eumpourtante é van devàn tot é tcheut eumbosquétaye de fleur rodze, la rèina di corne, é de fleur blantse salla di lasì. Pe l’ocajón, le patrón di vatse beutton a totte le pi dzen caró que l’an. Lo dzor deut, amì é paèn veugnon pe édjé é partesipé a la dézarpa. Aprì sen dzor de deur travaill, l’et eun momàn de fita pe le-z-arpiàn. Van retroué leur mitcho, catche cou belle la fameuille, le-z-amì é son fier de moutré de balle bitche san-e aprì la sèizón eun montagne.
Eun cou, tcheut attégnaon de vire pasé la dézarpa pe le tsarriye di veladzo. L’ie eun momàn de grousa émochón é de jouése annonchà de llouèn pe lo son di caró.
Ara, caze pertot eun pourte bo le vatse atò le camion, mi teteun catcheun teun deur é veun bo avouì le bitche a pià pe sacante quilomètre.
Le-z-arpiàn fan eun travaill eumpourtàn pe l’économie, mi étò pe lo péizadzo eun lo mantegnèn é leur prézanse l’è fondamantala.
Dèi lo 1991, eungn organize eun Vatornentse, deun la comba de la Gran Becca, caitsouza que groppe eunsemblo lo vardé é beutté eun valeur seutta tradechón avouì lo tourisme. S’ajèi de la dézarpa de Votornéntse caratérizéye pe le déféente-z-armaille que bèison de montagne avouì le-z-arpiàn é pason i mentèn de an matse de dzi, touriste, valdotèn é querieui, que lèi beuchon di man su le rotte é fan fita.
Can la manifestachón l’è levréye, tsaqueun emboue se vatse deun le beui de plan ; la nèi é lo dzaleun tarderén po a arrevé. La sèizón eun montagne é to sen que l’et accapitó l’è renque pimì qu’eun souvenir, mi maque canque l’éforié que veun…
![La brantse de pesse garnia de fleur rodze de papì é de petchoù merieui l’è presta pe itre la coronna de la rèina di corne de la montagne](/site/foto/1_5864_d.jpg)
![La vatse que l’a baillà pi de lasì lo lon de l’étsatèn su eun montagne l’aré comme coronna an brantse de pesse garnia de fleur blantse de papì](/site/foto/2_5865_d.jpg)
![Le vatse chorton di beui: son dza belle preste pe bèiché bo eun plan aprì le lon mèis de l’étsatèn pasó eun montagne](/site/foto/3_5866_d.jpg)
![Le queunte frenacllèize seutte vatse! Bicllèyon pe la pourta djemì iverta pe vire sen que l’et eun tren de accapité](/site/foto/4_5867_d.jpg)
![Eun queutte la montagne pe bèiché to todzèn eun plan](/site/foto/5_5868_d.jpg)
![La patronna grope lo bosquet i fron de la rèina di corne](/site/foto/6_5869_d.jpg)
![An matse de dzi chouon la rentse di vatse lo lon de la rotta que va canque eun Vatornentse](/site/foto/7_5870_d.jpg)
![Bo i veladzo de dzi n’a bièn de pi é tcheut beuchon di man i vatse que pason](/site/foto/8_5871_d.jpg)
![Le vatse se retrouon deun lo pro que l’an aprestó pe le bare](/site/foto/9_5872_d.jpg)