(patoué di-z-Amaveulle)
La fita de la fiocca a Bèileun l’è nèisua deun lo 1972 d’eungn’idó di Comité di Tradechón d’Oveuzo pe reprende la fita di patrón tradechonella. Euntre le motivachón que l’an pouchà a réalizé caitsouza de nouvì, no trouèn étò la voya de chotre tchica d’eun sertèn izolemèn sochal a travì de momàn de fita que beutton eunsemblo le dzi.
Pe arrevé a Bèileun, deun la parotse d’Oveuzo, fo prende la rotta que vat eun Vagrezentse canque a Planaval, dèisèn canque i veladzo a 1800 mètre d’otcheui. Eun cou, can le dzi allaon a pià, eun pasae di Mon-Colón, rendjamente dèi Runa!
La dzornó eungnoue avouì an coursa a pià : la martse de la fiocca que, deun lo 2011, l’et arrevéye a sa veuntcheun-ima édechón. Dèisèn y è la maenda avouì eun menù tradechonel : polenta, carbonada, brossa, sosa é fromadzo é la prémiachón de la martse a pià. Lo momàn pi attendù l’è si de la dèinon-a avouì la deustrebuchón a tcheut de la fiocca de la par di Comité.
Seutta manifestachón l’at eun bon sussé, t’ou pe lo llouà ieui se fé, i mentèn de montagne que euntsarmon, t’ou étò pe le produì que te pou agouté, tcheut quezeun-ó pe le volontéo di Comité. La rèina de la fita l’è la fiocca de Bèileun que l’a tri caratéreusteuque resue eungn éretadzo di passó : la caletó de la crama, lo llouà ieui eun la monte, lo Gran Barmì, é le moublo qu’eungn eumplèye, le fouet, que eun cou sayàn fé atò de brantse de verna ou de bioula.
Seutta fita teurie an matse de dzi é son sussé l’è meeuto di travaill di nombreu volontéo di Comité di Tradechón d’Oveuzo. Nèisua deun lo beut de fiye caitsouza eunsemblo, maamàn que le-z-àn pason l’a saù se renouvelé sensa pédre l’esprì essanchel, eun vardèn solide le rèise deun la queulteua locala. So fé la déféense avouì tan d’atre fite di mimo janre é l’a dzouyà a la fiye cougnitre co pi llouèn de noutra vallaye.
![Le-z-ommo pourton le grouse tséidiye pe apresté la fiocca](/site/foto/1_5766_d.jpg)
![Pe apresté la fiocca fo débattre pouza la crama atò de fouet de bioula](/site/foto/2_5767_d.jpg)
![Eun dérì l’atro, le-z-ommo, avouì le tséidiye é le fouet, van ver la Borna di Djablo](/site/foto/3_5768_d.jpg)
![Devàn la Borna di Djablo lèi son dza eun mouì de querieui que attègnon](/site/foto/4_5769_d.jpg)
![Dedeun la Borna di Djablo la llase deue to l’étsatèn ; fo la écllapé atò lo piolet é nen beutté tot alentor di tséidiye pe battre la crama](/site/foto/5_5770_d.jpg)
![Atò lo fouet de bioula, fo débattre a coueutte la crama que montèye amoddo](/site/foto/6_5771_d.jpg)
![La fiocca l’è caze presta : nen n’aré pe tcheu le galeup… é n’a fenque pe le bèrio de la Borna !](/site/foto/7_5772_d.jpg)
![Le pi querieui bicllèyon pe la borna teuppa é attègnon lo momàn d’agouté](/site/foto/8_5773_d.jpg)
![La fiocca l’è belle presta dedeun le tséidiye topéye atò de pateun blan](/site/foto/9_5774_d.jpg)
![La rentse di tséidiye plén-e de fiocca : de jouése pe le galeup!](/site/foto/10_5775_d.jpg)
![Le-z-ommo melatton le tséidiye ver lo llouà de la fita](/site/foto/11_5776_d.jpg)
![Eun mouì de galeup attègnon d’agouté la fiocca](/site/foto/12_5777_d.jpg)
![Lo momàn de la deustrebuchón : nen n’a pe tcheut, po fata de pouché !](/site/foto/13_5778_d.jpg)