Sent Antouéno abbé l’è eun di sen pi populéro tchi le campagnar. L’ è lo protéteur di bitche domesteuque, seurtoù di gadeun é de tcheu sisse que nen sognon la trasformachón. Euntre le parotse é le tsapalle dédiéye i sen deun totta la réjón, y è la tsapalla di veladzo de Veulla de Arnà, eun llouà bièn cougnù pe la prodechón di lar DOP (Dénominachón d’Orijinne Protédjéye). La tsapalla l’et itéye batia deun lo 1785, an que l’è marcó su la pise métressa, fran deussù la pourta d’entrada. Lo sen l’et euncó reprézentó pe an peunteua su la fasada.
Sent Antouéno l’è marcó su lo calandrié lo 17 de janvir é a Arnà eungn a todilón vardó si dzor djeusto pe lo sélébré.
L’è san manqué an fita reutse de rite tradechonnel a partì di momàn ieui eungn anonse la sélébrachón di patrón : la vèille le dzoveun-o monton su lo cllotché de la tsapalla é trequeuidon de 6 euye a 8 euye di mateun.
Lo dzor di patrón le dzi di veladzo de Veulla l’an la coteumma de ivrì leur mitcho pe semondre i dzi de boillón ou de veun tsât.
Le rite caratéreusteucco de la fita son la bénédechón di bitche é di moublo de la campagne, seurtoù di trateur, la Messa, l’anchère pe recouillé de sout pe la tsapalla, lo teriadzo di pri de la lotie, lo maenda de Sent Antouéno é, pe levré, lo denì.
L’è fran i denì de si dzor de fita qu’eun cher le prieur eun lèi baillèn dou bosquet de fleur. Pe itre cherdù comme prieur, fo po itre marió. Eun cou, faillè étò avèi fé lo sordà é pi fo que le dou garsón s’euntendèyan amoddo perqué dérèn pasé eun mouì de ten eunsemblo pe organizé la fita. Dèi le premì dzor de novembro, le dou nouvì nommó, atò eun satsón, fan lo tor di fameuille d’Arnà pe le-z-eunvité i patrón é pe vendre le beillet de la lotie.
Eun pi, le prieur atseuton étò le pri pe la lotie ( seurtoù de bague llétéye a la campagne, comme de râtì, de moublo pe la veugne, de sirculére, de résette élétreuque, mi étò de bitche) é co le pri de partesipachón pe le propriétéo di bicthe é di machinne que resèivon la bénédechón.
A la feun de Messa, le dou prieur, arbeillà égal, eun chouèn eun rite tramandó, semondon a tcheut de bocón de pan bén-ì.
Lo patrón d’Arnà l’è cougnù deun totta la Valló comme eunna di fite de Sent Antouéno pi otanteuque, eun contrefor pe lo mondo rural que tsandze todzor de pi. Eun mondo ieui son plantéye bièn a fon le rèis di peuplo valdotèn é la comunitó de Arnà lèi crèi de pi todzor.
