(patoué di-z-Amaveulle)
La pi eumpourtanta fita crétchenna deun l’an l’è san manqué Tsalende, avouì se seremonie, se rite solannel é se tradechón populére que l’an de rèis a fon.
Eun rapelle la néisanse di Bon Djeu lo 25 de désambro, mi étò la vèille avouì Messa minite. La crèche, que sarie pi la reprézentachón iconografeucca de la nativitó, l’et eun di-z-élémàn pi caratéreusteucco de seutta fita relijeuza. La tradechón voudrie que l’ache orijine de sen Fransoué d’Assise, i comensemèn di XIII siéclle.
Eungn’évolechón de la crèche l’a baillà viya i fourme téatrale de la reprézentachón de la néisanse de Jézù : le crèche vivante.
L’è probablo que seutte vegnèyan de fourme bièn pi viille de dramatizachón liturjeucca que l’an produì le mistère, mi no cougnisèn panco amoddo de ieui no arreuvon.
Eun Val d’Outa, la crèche vivanta, cougnua étò avouì lo non de « le berdjé », l’et eunna di coteumme de Tsalende la pi populéra. Le premì doquemèn valdotèn son de la feun di XIX siéclle : eun écrì pe lo tsanéno Pierre-Antoine Cravel su le coteumme relijeuze é populére valdoténe é l’atro de Tancredi Tibaldi su Tsalende é Messa minite a Tsateillón. Deun eun mouì de parotse valdoténe, le fidélo arbeillà comme de berdjé, pourtaon eun tsantèn l’agnì i pégno Jézù. A Tsateillón eun baillae fenque campa a de tourterelle fran eun si momàn.
Euntre le déféente sélébrachón liturjeuque de minite deun la réjón, salla de Saint-Nicolas, petchouda parotse de la Ota Valló, l’a vardó lo tsarmo d’eun cou. Saint-Nicolas l’et étò cougnù pe itre lo llouà ieui l’è nèisù l’abbé Jean-Baptiste Cerlogne.
Inque, lo randévoù de Messa minite, avouì la crèche vivanta, l’et an tradechón bièn viille.
Deun le deri-z-àn, la Sente Fameuille l’et itéye reprézentéye pe de statue de bouque squeultéye pe eungn artizàn di veladzo, mi deun lo 2011 l’et itéye eunterprétéye pe an cobbla avouì leur popón. Le-z-atre personadzo de la crèche, le berdjé é le-andze, son, comme eun cou, le tsantre é le mèinoù de Saint-Nicolas.
Fondamantala l’è la partesipachón de la tsantiye que propouze de canteuque tradichonelle de Tsalende, seurtoù la Pastorala, lo bocón que pi reprézente la nèisanse de Jèzù, écritte eun patoué pe l’abbé Cerlogne.
Sen qu’eun proue eun véyèn la crèche vivanta é eungn acoutèn le canteuque, baille bramente d’émochón é te fé vivre défentamente la nèisanse de Jézù. Le texte di canteuque eun patoué, lenva maternella, é eun fransé eunsemblo i personadzo di berdjé eunterprétachón fidéla di passó, fan rechotre le-z-orijinne queulterelle di valdotèn que se recougnison deun sisse momàn dzen é seumplo. Fran comme l’ayè moutró Cerlogne a travì sa via é se-z-écrì.
