(patoué di-z-Amaveulle)
Plachà i sondzón de la comba de Sen-Bartouloumì, deun la parotse de Nus, lo santuéo de Cunéy l’è lo pi aat d’Eroppa (2.656 mètre). Avouì de bèque tot a l’entor, no moutre eun péizadzo sarvadzo de aata montagne.
L’è fran de la conformachón di téritouéo que no veun son toponimo : son non voudrie diye « i cu de la nèi ». Lo santuéo de Cunéy semblerie itre lo pi vioù de la réjón, mimo se no sen po cheur de signa orijinne. Le premì doquemèn cougnù que repourton lo non de seutta tsapalla dédiéye a Noutra-Damma- de la Nèi de Cunéì, son di 1656.
Lo fé de baatì an tsapalla deun si llouà s’espleuque deun na conta que prèdze d’eungn’estatua de la Vierje que, tramouéye deun d’atre llouà, tornae tcheu le cou i cllapèi de Cunéy.
La particularitó de seutte streteue relijeuze son le ex-voto, de peunteue comandéye pe de dzi que l’ayàn resù an grase é bailla-le i santuéo pe remersiemèn.
Le pi vioù ex-voto di santuéo de Cunéy l’an pi de dou siéclle. Son seurtoù de don de dzi de Nus ou de parotse protso, mi di Canavé é de d’atre llouà étò. Dérimente son itó restoró é, tchica pe cou, espouzó deun lo santuéo dedeun an tsambra esprés.
Lo 5 oût, a Cunéy, comme deun d’atre santuéo valdotèn dedià a la sente Vierje, eun fé la fita de Noutra-Damma- de-la-Nèi. Si dzor s’è todzor vardó deun lo ten n’eumporte queun sièye lo dzor de la senaa.
Pe arrevé i santuéo n’a po de prosechón tcheut ensemblo, mi n’a déféente possibilitó. Catcheun cher de partì a pià de Lignàn, d’atre, pe fiye pi vitto, profiton di tsemeun trachà que renque pe si dzor son iver. Cattro tsemeun pourton i santuéo. Eun cou, eun partchè di veladzo de Lignàn a pià é atò le melet.
Lo mateun eun di dave messe : la premie ver 8 euye é demì é la messa granta eun la di defoua ver 10 é demì. Can seutta messa leuvre, comenche la prosechón ver la fontan-a que l’è a apepré 200 mètre di santuéo.
La creu ivre la prosechón, dèisèn lèi son le fidélo, le tsantre é d’atre parotseun é to lo lon, eun tsante le litanie.
Dèi qu’eungn arreuve a la fontan-a, seumbole de l’orijine de totte le-z-éve de la pégna comba de Sen-Bartouloumì, l’enquerà moille la creu deun lo ru tri cou (tri cou son itó le dzor que Jézù l’a pasó deun lo tombó devàn que resusité) pe bén-ì l’éve que pourtèye todilón la via pertot.
Aprì si rite de l’immerchón de la creu, l’è lo momàn de maenda servia pe sisse que teugnon lo refuje ou que tsaqueun l’a pourtó deun son tascapàn.
A la feun de la dzornó, eun fé l’anchère di bague que le dzi l’an baillà i profì di santuéo.
Mimo se catche tsandzemèn lèi son itó, la prosechón de Cunéy é le rite que lèi van avouì se son vardó deun lo ten grase i jénérachón passéye que l’an saù moutré i nouvile l’attatsemèn a la relijón.
