(patoué di-z-Amaveulle)
Lo fé de réyé de fouà deun le veladzo é su le cretsón l’è partadjà eun Val d’Outa comme deun tcheu le paì eropéèn. Apparteun i sicle di prateuque, catcheun-e payenne, que eungnouon lo 23 de jeun é leuvron lo 29 avouì la fita di Sen Piére é Pol.
Eun Val d’Outa, n’a sacante parotse é tsapalle dédiéye a Sen-Piére é la tradechón di grou fouà pe fiye oneur a si sen s’è vardéye deun lo ten.
Mi a selón di-z-époque, lèi son de motivachón déféente que l’an jeustifia-le. A l’arba de la sivilizachón, can lo fouà l’ie considéró lo pi noblo di-z-élémàn, si que pi de tcheut s’aprotsae de la divinitó, eun demandae i fouà la féconditó de la téra é de se produì, de sogné la santé di bitche, de protédjé le mitcho é le dzi de la foudra, di fouà, di maleficho é di sorchie.
Le fouà sayàn fenque viìn de moyèn de comunicachón é, tchica pi protso deun lo ten, ver la premie méitchà di 1900, an magnie pe tchoué le croué bitche que atacaon le plante.
Fenèite la guéra, aprì de-z-àn ieui eungn ayè pamì pratecó si rituel, la volontó de catche-z-ommo l’a revéillà deun d’atre étò la voya de torna lo fiye. L’è pai que son nèisù le fouà de sen Piére su la Becca di Vioù a Sen-Cretoublo.
Eun rèye lo fouà de nite, su la poueunte, a 2856 mètre d’otcheui. Sisse que monton su, fo que pourtèyan deun leur tascapàn tchica de bouque que trouon dza aprestó é eunmatchà a la montagne de Vioù. Aprì avèi courzù pouza, ver 10 euye di nite, comme prévèi lo rituel, comense lo momàn que tcheu le partesipàn attègnon : eun rèye lo fouà, mimo se fé croué ten.
Le fouà son l’espréchón la pi seumpla é la pi viille de la jouése é, fran pe sen, son étò euntre le manifestachón pi dzente é plén-e de tsarmo.
