Aprì la Tsanson dou Pay de l'abbé Henry, petchoù poème eun coplet eun rima, ioou l'oteue prén eun considérachón totte le parotse de la Val d'Ousta eun beuttén eungn évidanse leue particularitoù, l'é ara lo tô de Patrizia Lino que no propouze eun sujestif é orijinel voyadzo poéteucco eun coplet leuibro a travè di 74 quemeun-e de la Val d'Ousta.
Eun peui de l'argumàn cherdeui, sén que le dou livro partadzon l'é lo patoué, lénva di queue pe l'abbé Henry que, comme l'a icreui René Willien, l'é eungn enfant du pays, é lénva cherdeuya pe Patrizia Lino que l'a trouoù deun la Val d'Ousta son paeui d'adochón.
Patrizia Lino aparteun eungn éffé a la catégorie di nouveaux patoisants ; objé d'iteudzo d'antropolojiye de Christiane Dunoyer, que eunsémblo a eunna espozichón, n'én soutìn é propouzoù a la communotì. Le nouveaux patoisants reprézénton salla noua catégorie de locuteue que veugnon de réalitoù difiénte é que voulon pa mèi aprénde lo patoué mi étó partadjì noutro patrimouane queulterel. Lo patoué veun donque an fasón pe se recougnitre deun la communotì valdotén-a é pe itre fieu de feuye parteuya de eungn'idantitoù que crèi, eun mantegnén se rèise, étó avouì l'euntégrachón de queui veun veuivre deun noutra réjón.
Patrizia Lino l'a trouoù seutta formachón merseui i course de l'Ecole populaire de patois organizoù dèi l'an 1995 pe l'Assessorà de l'éducachón é de la queulteua de la Val d'Ousta, l'oteue l'a retìn que lo seul appréntisadzo di patoué l'euye pa suffizàn é l'a vouleui se mezeì avouì la poézeuye eun fién eun parcoù personnel caratérizoù d'an grafeuya que se ditatse de salla propouzéye pe l'icoula de provegnanse.
Lo rézultà l'é an séreuye de coplet leuibro, plèizén a llire, ioou rechô to l'amoù pe noutra téra é pe salla lénva que, mioù de totte le-z-atre, arreue a esprimì le sénsachón é le santimàn di valdotén : lo patoué! Eun fién le complemén a Patrizia Lino pe èi bailla-no Le parole de mon voyadzo, no no souétén que si livro de poézeuye serviche d'ézeumplo, tan i nouveaux patoisants comme a sisse que prèdzon patoué dèi todzô.