Nicod Arduino conte :
« Can alavo lardzì lé fèye, cahque co, fiyavo dé bahtón rébécà. Corbavo lé dzeut di herle é di tsahtagnì é lé gropavo to dé gore ou dé lentan-e. Lé quittavo lai gropà pé in mis é can véyivo qué y avivon prét la forma lé tayavo déré. Apoué lé lichavo sétsì, toujour gropà, perqué sé lé dégroppavo, lé piemavo é lé assouyavo ».
Ató la vouése de Sandra
To lo boh dé tsahtagnì fiyavon co lo ban di vatse é la rètse. Pé fae la rètse prestavon dé lon tavé é ogne métre y é fiyivon in boé pé fae entré la tsén-a di vatse.
Pé tugnì su lé tavé ogne ten métre piahiavon dé colenne qué sivon féte to dé biyón dé herla. Sé la tsén-a, y ive tro londze, déré y é beuttavon dé sicoulón.
Lé sicoulón
Lé sicoulón sivon dé toc dé bohc carà to lo boé ou méh, qué servivon pé rehquieurhì la tsén-a. Selón dé tamme fantive rehquieurhi-la né beuttavon eun ou do ou tré.
Né beuttavon tré can lé vatse sivon a bore paé lé tignavon pieu ferme.
Ató la vouése de Sandra
Ató la vouése de Sandra
Ató la vouése d'Ephrem
A l'ehtabio y ive co lo cabouet dou portset.
Dé cohténma sive carà ou berlón é sive fét to dé tavé dé tsahtagnì perqué sive in boh deur é can lo portset ravadjave, lo cabouet tugnave é sé débélave pa.
Ent‘in cantón y avive lo biyet. Lo biyet sive in toquet d'in biyón dé tsahtagnì tsavà pé fae ihté la piqué. Aper dou biyet y ive toujour na paletta dé boh pé poussé outre la piqué ou portset.
Ié don-avon da piqué do co per dzor.
Féyavon la tsoudén-á é beuttavon couée dé gneuf di béhque, dé tsahtagne é dé tréfolle.
Can sive tot couet, pouijavon cahque potchià é mehquiavon avó l'erba tsapiaye é portavon piqué.
Pa poue totte lé fameuye pouyivon vardé in portset perqué y avivon pa da piqué a doun-i-ie.
Ató la vouése d'Ephrem
Lé crotset di vé lé fiyivon to dé dzeut dé herla. Prendivon dé dzeut é lé tsapotavon piat lanque fiyivon lo boé pé croutsi-le é la resta lé lichiavon rión. Dou coté dé foua y é gavavon pa gnanca l'ehcor.
Lé crotset servivon pé taqué lé vé apén-a nà. Empiéyavon lo crotset dé boh ou post dé la tsén-a péqué lé vé y avisson pa ehtranguia-se.
Ató la vouése d'Amélie
Lé tsambié lé fiyavon to dé dzeut dé herla.
D'ivér can fiyave fret alavon tayì lé dzeut di herle é lé portavon a l'ehtabio ou bontèn. Lai lo boh vignave ouméyo é corbave pieu len. Lo nét enté la véyà lé tsapotavon.
Pé premì baga gavavon l'ehcor, apoué lé corbavon tenque y avisson prét la forma. Apoué d'in coté y é fiyavon lo boé é dé l'atro coté y é fiyavon lo crotset pé croutsi-le.
Lé tsambié servivon pé taqué lé tsivre, lé tsévrèi, lé fèye é lé moutón a la rètse.
Ató la vouése de Sandra
Ató la vouése de Sandra
