(patoué de Gressàn)
Lo Charaban l'é an compagnì pa profèchonella de téatre que fé seu spettacllo eun patoué. La compagnì l'é nèisiya eun Veulla l'an 1958, de eungn'idoù di Comité de Traditions Valdôtaines (CTV), to de chuite reprèiza pe René Willien, animateur preunsipal de la compagnì tanque can l'é mancoù, l'an 1979.
La compagnì l'é nèisiya avouì la voya de fiye riye lo pebleuque eun prézentén de pyise amuzante, mi euncò de fiye pensé si la nésessitoù de vardé vivàn lo patoué, que deun sisse-z-àn l'é eun dandjì a coza de la viya que tsandze, pi moderna, eungn eunvitén le dzi a prédjì patoué é a trasmettre la lenva di queue i dzoueun-o.
Lo sussé, que gneun s'atégnave la premì nite, l'a accompagnà lo Charaban euncò deun le-z-àn aprì é l'a permetti-lei de fité, fran eun santé, l'anniverséo di seuncant'an.
Mimo se le spettacllo se fan pamì deun an petchouda sala, mi deun lo pi grou teatro de Veulla, lo Théâtre Giacosa, pe an senaa entchiya, lo Charaban ramplèi todzor le poste. La dimoutrachón l'é que y é todzor la tsasse pe le beillet, an baga que fé partiya de l'évènement é que le pachon-où atègnon avouì eumpasianse.
Le spettacllo portoù si lo palque deun si demì siécle l'an contoù, de fasón ironeucca é satereucca, la viya de la fameuille é de la sosiétoù, le coutimme é le fénomène poleteucco valdotén, eun tsertén d'alé eunsemblo é de prédjì de eunna sosietoù eungn évoluchón.
