Lo dzah dé tsahtagnì
D'outón can lé foye di tsahtagnì é di herle sivon totte campaye, alavon retsaviyì lo dzah pé redzahì lé vatse.
To lo rahté amouélavon lé foye é fiyavon dé andagn ou dé montón pé pouiyì fae lé brahié. Apoué ehpatavon lo felà (lé felà sivon fét to dé cordón dé tsén-evvo, y avivon dove quiavette é do péhén), betavon cheu brahié d'en lon é saravon la miquià dou felà.
Apoué betavon dove brahié d'in sen é dove dé l'atro é saravon en pocca lé corde paé lé brahié alavon déféte.
A la fén saravon la corda dou méh é apoué lé-z-atre cattro corde, dove d'in sen é dove dé l'atro. Pé qué lo dzah y avisse
pa sortì, cordavon lo grop en fiyèn passé la crouizà i boé. Can lo paquet sive fét, tchertchavon in post pé beté-lo en poza pé poui-lo tsardzì so lo payet. Sé lo tsemén da fae sive lon, fiyavon na poza pé réfié in momèn. Pozavon lo grop so in meur pé avé len a torni-lo tsardzì.
Lo dzah ou dzahì
Lo dzah lo portavon ou dzahì. Cahque co, can y avivon pa bièn dé ten pé alé ou dzah, alavon fae na vertoyà tan pé avé-ne en pocca pé rédzahì.Endonca empiéyavon pa lo felà ma bastave lo fioré qué sive fét dé téla dé trouédzo é y avive cattro péhén. Féyavon cattro brahié, lo tchardjavon en so l'ehtseun-a é lo portavon a l'ehtabio perqué y avivon fran manca pé rédzahì. Ognentàn, can ent'ou bantsì y ive bièn dé quer alavon ramahì dé dzah to lé aeuh é lo técavon dedeun lo bantsì pé seurbé lo quer.
