(patoué di-z-Amaveulle)
Lo livro de la Conta di Rat marque eun nouvo tsapitre de la colaborachón euntre l'Assessorà de l'éducachón é de la quelteua é l'artista di déssèn Francesco Tullio Altan.
La publicachón, dédiyéye i mèinoù que van a l'écoula, l'at la fonchón de suppor didatteucco i projé pilote que, dèi l'iforié 2013, l'a pourtó lo patoué deun le-z-écoule valdoténe eun calitó de sujet facoltatif.
Seutta conta, que l'è teriéye di bagadzo queulteel valdotèn, l'et itéye traduiya deun le déféente variante de patoué é, pe po favorizé an varianta pitoù que eugn'atra, le padze di livro, pai comme vo le-z-accapéde, sont itéye eumpriméye sensa l'écrì de la conta.
La conta écrita, deun sa verchón euntchia é deun sa verchón queurta, se pou détsardjé, eun cherdèn la varianta de patoué que lo petchoù écouillì lame de pi.
