L'Assessorà réjonal de l'éducachón é de la queulteua de la Réjón otonomma Val d'Outa l'a prézentoù a Pontey, lo 11 e 12 de mi 2017, a la Fita granta di 55° Concoù scolére de patoué Abbé J.-B., la Collechón Patoué é idantitoù que comprèn le premì dou livro que son itoù cherdì comme meillaou traaille de retsertse fé pe le-z-icoulle que l'an partisipoù a la passaye édichón di Concoù.
Dèi que l'è nèissì, deun l'an 1963, - di Chantal Certan, Assesseue à l'éducachón é a la queulteua - , lo Concoù Cerlogne l'è todzoo itoù eungn eumportàn eunstremèn de promochón di patoué é de la sivilizachón valdoténa deun le-z-icoulle de noutra réjón.
Malgré que lo patoué sèye eun tren de se dipédre pequé todzoo mouèn de dzi traaillon la campagne, le cllasse que partisipon a seutta inisiativa arreuvon euncó a trouì le braze deun eun passé pitoù résàn, débilavàn dza llouèn pe seutte dzouin-o, que grase i Concoù tornon reprende le vrèye valeue de la communoté iaou vequèison é reprézenton lo lièn avouì la sochétoù que véré.
Deun si momàn iaou eun reprèn sette valeue é eun transmé le cougnissanse é le savouée, le pi pégno veugnon le protagoniste é deun la lenva di pégno conton, le espérianse é leue fasón de vére lo mondo, comme leue lo vèyon.
Seutta publicachón l'a l'euntenchón, d'eun coutì, de valorizé lo traaille fé pe le-z-icouillì é pe le metresse, de baillì an gratificachón pe leue eungadzemèn, la caletoù di rezultà final, é, de l'atro, de euncoadjì de nouile produchón eun patoué que permettérèn de contegnì seutta dzenta aventeua di Concoù Cerlogne, de an eungn an.
Lo premì livro prézentoù conserne la retsertse Lo Tsahtagnì, réalizaye pe le-z-icoulle élémantére d'Arnà.
Seutta publicachón l'è itaye financhaye pe la lloué 482 di 15 désambre 1999, que conserne le riillemèn pe la protechón di minoritoù leungueusteuque istoreuque.