(patouè de Veullanoua)
NEGRI Jules Ange
Veulla 1904 - Teeun 1995
Jules Ange Negri l'a vécù se premi-z-àn de via eun Veulla, ioi son pée s'ie tramó l'an 1888 di moumàn que l'ie eun di tecnisièn eumpléyà deun la costruchón de la premii sentrala féte pe baillé lo couràn a l'illuminachón pebleuca. Considéréte a l'épocca eun devàn su le ten, sa euvra l'è reustéte compouzéte deun lo cartì « lo Pon de Péra », poste bièn lamó pe l'oteur é ambientachón pe coutchun-e de se conte (« Le do prieur »).
Eun cou fenè lo lisé, belle se trailloo a la brasserì de Veulla, l'a contenuà se-z-étude a « L'école de brasserie » de la Facultó de Science a Nancy, eun Franhe. Fenè le-z-étudde, lo traille l'a oblidja-lo a se tramé deun lo Nor de l'Italiye pe s'occupé di tratemèn de la biéa é di lasì. Belle avouì l'otarchia eumpouzéte pe lo fachisme, l'ayè can mimo resè a prodouire an boun-a biéa avouì de pée di trifolle é pe ho l'Étà itaillèn l'ayè bailla-lei an valeur.
Eun Val d'Ouha son non l'è llétó a la Fountin-a di moumàn que l'a traillà pe que fusse recougnia sa origine. Lo livro Memoria storico-tecnica per ottenere la denominazione d'origine Fontina, écrì avouì M. Luigi Reggio, que l'a chouù la partia istoreucca de la retsertse, l'è di 1955. Vin-ì référàn pe l'Amministrachón réjonala, mimo se reustoo a Teeun, l'a organizó lo premii laboratouéo pe l'analize é lo controle di batére di lasì, baga que l'a miilloró la calitó di prodouì, é l'a organizó de course pe hisse que l'ayòn de-z-abro a frouì.
Mimo se l'ie bièn occupó pe son traille, s'è dédià étò a l'écriteua de conte eun fransè é eun francoprovensal, la lenva que eumplèyoo can l'ie pitchoù é que lamoo bièn. Lo patouè l'è reustéte étò la lenva que l'a eumpléyà pe sa premii pise de téatre populéro, Lo pion a la feira. Se conte, publiéte deun Le Flambeau é aprésiéte pe lo pebleucco é pe la creteucca, l'an comme eunspirachón la via de tcheu le dzoo (Conta de Toussen), le-z-abetudde d'eun cou (La messa di Peuccaillon) ou de noalle (Sepeulteura a la Granta).
Jules Ange Negri l'è mor a Teeun l'an 1995.