(patoué di-z-Amaveulle)
Perdéde po le pi dzente-z-imadze de la fita que l’a cllouzù la 62ima édichón di Concour scoléro de patoué « Abbé Jean-Baptitse Cerlogne » a Corméyeui lo 3 é 4 de jeun, an fita que l’a marcó eun cou de pi l’eumpourtanse de la queulteua francoprovansala é la forta partisipachón di mondo de l’écoulla.
Pi de 1300 écouillì valdotèn euntsarmó, avouì leur eunségnàn l’an partisipó a seutta fita.
An matse d’ativitó son itéye organizéye. De dzornaye reutse de spétacllo amezàn, l’espozechón di travaill réalizó pe le cllasse, tcheu su la trase di tème propouzó pe l’an : « Qui vole, qui tsante é l’at eun plumadzo gayoló ? ». De pégno laboratouéo é de momàn d’animachón lengueusteucca é queulterella son itó organijà pe rendre seutta fita eun momàn précheu de cougnisanse, de partadzo é de pasadzo di patrimouéno queulterel de la Val d’Outa.
Deun seutte dzornó son étò itó baillà le pri « Amì de Cerlogne » i-z-eunségnàn que l’ayàn partisipó a djé ou pi de djé-z-àn i Concour, pe recougnitre leur eungadzemèn é leur fidélitó eunver la promochón de la lenva é de la queulteua que pase a travì lo patoué.
Lo tème di concour pe l’an que veun 2024/2425 saré : « Ité é baillé lo non a l’espase, resté é se tramé ». La fita que cllouré se féré eun Veulla, eun souétèn que la partisipachón sièye nombreuza é apachon-éye.