(patoué dé Bretsón)
Comme i l’én deut ou momèn da prézentatsión dou gno sito, touit le més i vo minérén a dehquevrì le novétà, a modé dé tsi co éntó l’aprofondichemèn da gnoa roubrica “Eunna manira dé dire pé djor” qui troeu ou fonts da padja d’intrà dou portà.
A l’ét eun echtremèn utille pé cogniche mièi le patoué valdouchtàn a travers y “echprèsión idiomatécque”, saret a dire le manire dé dire qu’i son spéséfécque dé totte le léngue é qu’i l’an un sans moué diférèn dé tsou létéral. A l’ét un sans qu’ou l’at le chèi rich vents a pensà é vents l’ichtouére dé eunna quemenétà.
Én effet, le manire dé dire i l’aon a l’énvión un sans réal, ma ou lon dou tén tsou sans ou l’at alardji-se én totchèn dé idé pi achtréte. Fran pé tsen écquie a cognichéntsa di manire dé dire l’é eunna di tchoze qu’ou non l’aita pé comprénde si non cognich bén eunna lénga, ma acheu o mondo la qu’a l’a nachù.
Vents a roubrica dou sito, troeu peu, touit le co qu’i l’intreu, eunna manira dé dire diférénta én un di patoué da Val d’Ohta, énsémbio a cha tradutsión én fransé é én tayàn. Ma pa macque : i l’eu peu a possibilité co d’ehcouté o sonore.