(patoué di-z-Amaveulle)
Lo 26 sétembro l’è la Dzornó Eropéenna di Lenve, eunstituéye deun lo 2001 pe marqué l’eumpourtanse di déféente lenve é queulteue d’Eroppa. Seutta dzornó no rappelle po renque la retsesse reprézentéye pe le sacante lenve prédjéye deun lo continàn, mi étò l’eumpourtanse pe tsaqueun de alardjé son bagadzo lengueusteucco lo lon de totta sa viya. Aprende de noue lenve l’è po maque an questchón de comunicachón, mi eun moyèn pe se comprende mioù euntre tcheut é de crèite comme personna é deun la sosiétó.
Le lenve son eungn estremèn pouissèn de relachón, pe crèite, pe ité a l’ézo avouì le-z-atre é pe vivre eun pése. Dedeun eun mondo todzor pi globalizó, itre bon a se prédjé deun mouì de lenve l’è fondemental pe cayé bo le meur é bâtì de pon euntre le dzi. Mi seutta dzornó no-z-eunvite étò a mezaté su la plase que l’an le lenve minoritére, eun trézor précheu, mimo se frajillo, que so eunretsì lo patrimouéno queulterel eropéèn. Le recougnitre é le protédjé l’et éisanchel pe défendre sen que l’è déféèn é pe garantì que tsaque comunitó l’ache la possibilitó de prédjé signa lenva maternella.