Guizembro 2018
(patoué dé Arnà)
Dévàn lo 1950, en Val d'Ohta, lo Tsalende sive na féhta ayoù qué té alave a Messa é t'avive cahque gourmandize en pieu so lo tabia en fameuye. La cohtémma dé fae-sé lé régal entre lé dzen ié sive pa. Ren dé qué sé fiave pé lé minà, la féhta pé lor sive pieutó lo dzor di Rèi. Lé minà trouvavon ent'i tsahe penguian-aye ou dedeun lé hoque an pignà dé tsahtagne, dé caamele é sé alave ben dé tchicoulata, paé da senti-se proppe dé rèi.
Lo nom « Épiphanie » y et na paolla greca é vout deue apparichón. La féhta liturgdjica predze dé tre apparichón : lo batémo dou Bon Guieu é la vignà dou Sent Esprì; lo sen premì méahquio i nohe dé Canaan é la premì apparichón pubblica dou Bon Guieu ; l'adorachón di Rèi é l'apparichón dé la htéla di Rèi. La fèhta di Rèi pren en considérachón djeu eun-a dé helle apparichón. Sen Mathieu y et lo solet qué y at hcrit di Rèi so lé sente hcriteue é sensa deue-nó bièn dé bague. Lo lor nom, la lor queulteua orientala é lor éhtre dé Rèi son dé bague qué y an ihtà djouentaye apré, ma qué y an alimentà l'immadjinachón dé la dzen.
En Val d'Ohta la féhta sive bièn « solenne » : sé fiave la tséétó é sé coueddivon dé bague pé lé pieu poo. Ogne veladzo avive lé sen cohtémme. A Etroubles, Véèye é Liliane betavon na lutche lo lon d'in fi ent'é l'iguiéze pé fae sembièn ise ihtà la htéla di Rèi. A Tsanportsì, pé récordé lo batémo dou Bon Guieu, sé fiave la bénédichón a l'éve qué sé doave i béhquie, pé protedzì-le di maléfise.
Ign'atra cohtémma sive hella dé la torta di Rèi. Sé fiave couée dedeun na torta eun-a ou dove fave é qui trouvave la fava ent'ou sen toquet y ave lo drouet a cahtsoza, a na gourmandize. A Tsalàn Damòn la feuye qué trovave la fava sé mariave lo lon dé l'an.
A Arnà, en récordèn la htéla di Rèi, lé dzovéo fiavon la trén-a di Rèi : avó dé paye, dé héndra ou dé tèra guetavon ensembio lé porte dé do amoureu.
En « Gettaz », a Tsandéprà, sé son-avon lé quiotse dé la tsapala é lé minà alavon dé na fameuye a l'atra pé mandé dé gourmandize.
La dzen y avive co la cohtémma, la net davàn dé betè lo biàn dé l'ou ent'é na boutta d'éve, foua, paé da vére lé Rèi lo dzor apré.
Ou bièn, beutave co, la net davàn, foua so la faihtra, na hcouéla pin-a d'éve. Lo matén apré, sé alave vére qué imadze sive so la guiahe. Sé dzélave pa sive beurt segn. Ma co qué sive dzélaye sé tchercthave dé capì qué imadze sive paé da lie lo doumàn : na mort, in mèhté, in mariadzo.
Ma lo dzor di Rèi sive en Val d'Ohta, surtoù, lo dzor ayoù qué sé don-ave i minà dé piquiot régal : dé tsahtagne, dé caaméle, dé pomme, dé nouis, dé portigal, dé cacaouette, dé tchicoulata, na pouata dé htrah, lé piquiode bague qué na fameuye pouive permetté-sé. La vèye, poulitavon lé lor tsahe ou lé lor hoque, é lo matén apré trouvavon lo régal di Rèi ou fon dou iet.
Hitta tradichón y at sobrà en Val d'Ohta fenque ou 1930, co qué la « propaganda fascista » y at fet cognehtre la « befana ».
Hitta conquia dé tre persoun-e orientale é misteriouze qué en vièn na htéla y an voyadjà pé dé an pé alé adoré in minà qué y éèye tchandjà lo déstén dé la dzen pé portéye henque ivon dé pieu bé y et pamì paé sentì di fameuye. Sobre djeu mì la mémouée dé na tradichón, ma qué cahquieun contenive tootén a mantugnì.
Testo pret dé l'articlo "Il y avait autrefois les Rois..." dé Alexis Bètemps, 2003